სამართალდამცავებმა 6 თვის ტყუპების ცემის ბრალდებითა ძიძა დააკავეს. ვიდეომასალა, რომელშიც, სავარაუდოდ, ტყუპების ცემაა ასახული ტელეკომპანია იმედმა გაავრცელა.

სასამართლომ ძიძისთვის აღკვეთის ღონისძიების შეფარდებაზე უკვე იმსჯელა და მას პატიმრობა შეუფარდა. ამის შესახებ პროკურორმა იმედს განუცხადა.

"გამოძიებამ დაადგინა, რომ ბრალდებული, რომელიც ერთ-ერთ ოჯახში ძიძად მუშაობდა, 2017 წელს დაბადებულ ტყუპ და-ძმას, სისტემატურად სცემდა. ბინაში ოჯახის წევრების მიერ ფარულად დამონტაჟებულმა ვიდეოსათვალთვალო კამერამ ბავშვებზე მისი ძალადობრივი ქმედება დააფიქსირა, რის შესახებაც მცირეწლოვნების დედამ პოლიციას შეატყობინა", - აცხადებენ შინაგან საქმეთა სამინისტროში.

გამოძიება წინასწარი შეცნობით არასრულწლოვნის მიმართ ჩადენილი ძალადობის საქმზე, საქართველოს სსკ-ს 126 პრიმა მუხლის მე-2 ნაწილით მიმდინარეობს. ამ მუხლით, არასრულწლოვნის ცემა ან სხვაგვარი ძალადობა ისჯება თავისუფლების აღკვეთით ვადით ოთხიდან ექვს წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.