მარნეულის მოსახლეობა ქალაქში ბავშვებისთვის სათამაშო მოედნის მოწყობას ითხოვს.

მარნეულში მცხოვრები რაიან მაიკლ სმიტი თითქმის ერთი წელია მარნეულის მუნიციპალიტეტის მერიისგან ქალაქში საბავშვო მოედნის მოწყობისთვის ნებართვას ითხოვს. ბავშვთა გასართობი მოედნის გაკეთებისთვის აუცილებელი ხარჯების გაღებას ის საკუთარ თავზე იღებს. რაიანმა მუნიციპალიტეტის მერიას ნებართვის თხოვნით 2017 წლის აგვისტოში მიმართა, თუმცა ოფიციალური პასუხი დღემდე არ მიუღია.

„6 წელია მარნეულში ვცხოვრობ. ჩემი ვაჟი აქ დაიბადა. ის ახლა 4 წლისაა. აქ მისთვის გასართობი საშუალება არ არსებობს. მე და სხვა მშობლებმა გადავწყვიტეთ, ჩვენი შვილებისათვის გასართობი მოედანი საკუთარი ხარჯებით გავაკეთოთ. არის ადგილი, სადაც მოედნის მოწყობა შეიძლება, ვითხოვთ ნებართვას, მაგრამ მუნიციპალიტეტი ჩვენს განცხადებაზე არ გვპასუხობს,“ - აცხადებს რაიანი.

რაიანს კონკრეტული იდეაც აქვს. ამ იდეის თანახმად, სათამაშო მოედანი, შესძლოა რუსთაველის ქუჩაზე მდებარე მიხეილ ჯავახიშვილის მონუმენტის წინ არსებულ მწვანე ზოლზე განთავსდეს. “ეს იქნება უსაფრთხო, ღია სივრცე ხეებით გარშემორტყმული, რაც უფრო კომფორტულს გახდის სივრცეს ვიზიტორებისთვის. სათამაშო მოედნის აღჭურვა მოხდება ამერიკის შეერთებული შტატებში ნაყიდი მაღალი ხარისხის ატრაქციონებით, რომელთა საერთო ღირებულება 100 000 დოლარია. ჩვენი სურვილია ეს იყოს ყველაზე კარგი სათამაშო მოედანი, სადაც ბავშვებს გართობა უფასოდ შეეძლებათ,” - ამბობს რაიანი.

ბავშვთა გასართობი მოედნის მოწყობის მიზნით მან აქცია სოციალურ ქსელ ფეისბუქშიც დაიწყო, სადაც სპეციალური გვერდი - „მარნეულის ბავშვთა სათამაშო მოედანი“ შექმნა და საგანგებო მიმართვაც გაავრცელა. „ჩვენ გვჭირდება თქვენი დახმარება! მარნეულს, როგორც ყველა რეგიონალურ ცენტრს სჭირდება ბავშვთა სათამაშო მოედანი. აუცილებელია ქალაქში არსებობდეს ადგილი, სადაც ბავშვებს და მათ ოჯახებს შეეძლებათ დროის სასიამოვნოდ გატარება. თუ ეთანხმებით ჩვენს იდეას, გთხოვთ მოიწონით და გაუზიაროთ ჩვენი გვერდი თქვენს მეგობრებს. გააგებინეთ ქალაქის ხელისუფლებას, რომ გსურთ გქონდეთ უსაფრთხო ბავშვთა სათამაშო მოედანი. მოქმედების დროა,” - წერია მიმართვაში.

რაიანს უკვე ბევრი მხარდამჭერი ჰყავს. მათ შორის არის საადათ ალიევაც. მას ორი შვილი ჰყავს: 2 და 4 წლის. საადათი ამბობს, რომ ბავშვები დღის უმეტეს ნაწილს სახლში ატარებენ: "ახლომახლო არც სკვერი გვაქვს და არც მოედანი, რომ ბავშვებმა სუფთა ჰაერი ისუნთქონ და გაერთონ. ბავშვები მხოლოდ მაშინ გაგვყავს გარეთ, როცა მაღაზიაში ან საქმეზე გავდივართ. ზოგჯერ სკოლის სტადიონზე მიგვყავს პატარები, მაგრამ იქ არც სკამია, რომ ადამიანი დაჯდეს და არც სიმწვანე. აქ ბავშვები ბავშვობის გარეშე იზრდებიან."

46 წლის ფარჰად ბაბაევი აცხადებს, რომ მხოლოდ ბავშვებისთვის კი არა, არც დიდებისთვის არსებობს ისეთი ადგილი, სადაც ისინი შეკრებას და დასვენებას შეძლებენ: „კაცები მთელ დღეს ჩაიხანებში ატარებენ. ქალები კი ბავშვებთან ერთად სახლში არიან. სად გავიდნენ? ამხელა ქალაქში ერთი სკვერი და გასართობი მოედანი არა გვაქვს.“

როგორც მარნეულის მერიაში აცხადებენ, მათ რაიან სმიტის განცხადების შესახებ ინფორმაცია აქვთ და მისი განცხადება განხილვის ეტაპზეა. თუმცა, მერიაში იმასაც ამბობენ, რომ მარნეულის ცენტრში ბავშვთა გასართობი მოედნის აშენებისთვის საჭირო თავისუფალი მიწის ნაკვეთი არ არსებობს. გარდა ამისა, მერია საკუთარ პროექტზეც მუშაობს, რომლის თანახმადაც, ბავშვთა დიდი გასართობი მოედანი, შესაძლოა, მარნეულის შესასვლელში მოეწყოს.