საქართველოს მართლმადიდებლური ეკლესიის სინოდის 21 ივნისის სხდომის ოქმში ნათქვამია, მღვდელმთავრების განხილვის ერთ-ერთი მთავარი საკითხი ნარკოპოლიტიკა იყო.

სინოდი მიიჩნევს, რომ ნარკოპოლიტიკის ლიბერალიზაციის პროცესი უნდა იყოს დაკავშირებული ნარკოტიკებით მოვაჭრეთა და გამავრცელებელთა მიმართ უმკაცრესი სამართლებრივი ზომების გატარებასთან.

სინოდი სახელმწიფოს შემდეგი ნაბიჯების გადადგმას სთავაზობს:

  1. "ქვეყანაში დროულად უნდა შეიქმნას სათანადოდ მოწყობილი სპეციალური სარეაბილიტაციო ცენტრები, სადაც ნარკომომხმარებლებს გამოსწორების საშუალება ექნებათ;
  2. სინოდი მიიჩნევს, რომ ნარკოტიკების მოხმარებასთან დაკავშირებით საჭიროა მედია საშუალებების აქტიური ჩართულობა, ჯანსაღი ცხოვრების წესის დამკვიდრების მიზნით;
  3. სასწავლებლებში სპეციალური კურსის შემოღება, რომ ახალგაზრდებმა გააცნობიერონ, რას უქადის მათ ჯანმრთელობას ნარკოდამოკიდებულება და შეექმნათ უარყოფითი განწყობა;
  4. გამკაცრდეს ზომები ნარკოტიკების უკანონო შემოტანასა და გავრცელებასთან მიმართებით;
  5. საზოგადოებრივი თავშეყრის ადგილებსა და განსაკუთრებით, არასრულწლოვანთა წრეში მის მოხმარებასთან დაკავშირებით;
  6. ევროპული გამოცდილების გათვალისწინებით უნდა განისაზღვროს ნარკოდამოკიდებული ადამიანების სამუშაოთი უზრუნველყოფის საკითხი".