ზურაბ წერეთელი გაზეთ ასავალ-დასავალისთვის მიცემულ ინტერვიუში ამბობს, რომ ის ცოტა ხანში დაასრულებს ქრისტეს ქანდაკების მშენებლობას, რომლის სიმაღლეც მისი ასაკის შესაბამისად 33 მეტრი იქნება. როგორც ის ამბობს, ძეგლის დადგმა მცხეთაში სურს.

წერეთლის თქმით, ის აპირებს, რომ აღნიშნულ საკითხზე საქართველოში ოფიციალურ პირებს დაელაპარაკოს, ამ ეტაპზე კი შემოთავაზება რუსული მხარიდან აქვს:

„რუსებს უნდათ, რომ ქრისტეს ქანდაკება სოჭში, მთაზე დავდგა, თუმცა ჯერ არაფერია გადაწყვეტილი“.

წერეთელი აღნიშნავს, რომ მას ჩამოსხმული აქვს პატრიარქის ილია ll-ს ქანდაკება და მისი დადგმა ვაზის ჯვრის ქანდაკების წინ აქვს გადაწყვეტილი. ზურაბ წერეთელი რუსეთში მომუშავე, ქართული წარმოშობის მხატვარია.

ივლისის დასაწყისში, ტელეკომპანია დოჟდი რიას გავრცელებული ინფორმაციით, ზურაბ წერეთლის მიერ შესრულებული ქრისტეს 80 მეტრის სიმაღლისა და 200 ტონა წონის ქანდაკების დადგმა, სავარაუდოდ, პეტერბურგში იგეგმებოდა.