იუსტიციის მინისტრობის კანდიდატმა, თეა წულუკიანმა ყოფილ მთავარ პროკურორს, ირაკლი შოთაძეს პარლამენტის ტრიბუნიდანაც დაუჭირა მხარი.

საქართველოს პარლამენტში ახალი პრემიერისა და ძველი მთავრობის დამტკიცებისთვის საკომიტეტო მოსმენები მიმდინარეობს.

წულუკიანმა გამოსვლისას განაცხადა, რომ სისხლის სამართლის კანონმდებლობაში 2016 წლის ივნისის ცვლილებები სწორედ ირაკლი შოთაძის მხარდაჭერით გატარდა. ცვლილებების მიხედვით, "წინა ხელისუფლების დროს გამტყუნებული" პირების საქმეებში პროკურატურას სასამართლოსთვის ახალი გარემოებების შუამდგომლობით მიმართვა შეუძლია.

"სხვათა შორის ბატონი ირაკლი შოთაძის [მხარდაჭერითაც], რომელიც ვიღაცებს არ მოსწონთ, მაგრამ მე მას მხარდაჭერას ვუცხადებ ამ ტრიბუნიდან კიდევ ერთხელ".

მინისტრობის კანდიდატის გამოსვლის შემდეგ, ევროპული საქართველოს ლიდერმა, ელენე ხოშტარიამ თქვა, რომ თეა წულუკიანმა ირაკლი შოთაძეს ამ ჯერზე "ცოტა მადლობა გადაუხადა".

"რამე კრიზისი ხომ არ გაქვთ? რამე აზრი ხომ არ შეიცვალეთ იმასთან დაკავშირებით, რომ შოთაძემ მოქალაქეებთან ნეტავ რამე ხომ არ დააშავა?" - თქვა ხოშტარიამ.

31 მაისს თბილისის საქალაქო სასამართლომ ხორავას ქუჩის საქმეზე ერთი ბრალდებული სარალიძის ნაწილში გაამართლა, ხოლო მეორე ბრალდებულს სარალაძის ნაწილში მუხლი შეუცვალეს. სასამართლოს გადაწყვეტილებით ცნობილი გახდა, რომ პროკურატურამ დავით სარალიძის მკვლელი ვერ დაადგინა.

სასამართლოს გადაწყვეტილების შემდეგ სარალიძის მამამ აქციები დაიწყო, იმავე საღამოს გადადგა მთავრი პროკურორი, ირაკლი შოთაძე.

შოთაძის გადადგომის შემდეგ თეა წულუკიანმა განაცხადა, რომ მხარდაჭერას უცხადებს მას და მის გადაწყვეტილებას არ ეთანხმება.