რეგიონული განვითარების და ინფრასტრუქტურის მინისტრობის კანდიდატის, მაია ცქიტიშვილის განცხადებით, რიკოთის უღელტეხილზე ავტობანის მშენებლობა ორი წლით გადაიწევს.

მინისტრობის კანდიდატის განმარტებით, ტენდერი რიკოთის უღელტეხილზე ავტობანის ასაშენებლად წელს გამოცხადება.

ცქიტიშვილის განმარტებით, ავტობანის მშენებლობა, რაც მოიცავს 50-ზე მეტი ხიდისა და 50-ზე მეტი გვირაბის მშენებლობას, თავდაპირველი გეგმით 2021 წლისთვის უნდა დასრულებულიყო.

"დაზუსტდა პროექტი. ასევე, საჭირო გახდა ამ პროექტის გახანგრძლივება 2022 წლამდე. ისევე, როგორც ღირებულება გაიზარდა დაახლოებით 300 მილიონი ევროთი", - განაცხადა ცქიტიშვილმა კომიტეტების გაერთიანებულ სხდომაზე, სადაც მინისტრობის კანდიდატებს უსმენენ.

საქართველოს პარლამენტში ახალი პრემიერისა და ძველი მთავრობის დამტკიცებისთვის საკომიტეტო მოსმენები მიმდინარეობს. მოსმენა გაერთიანებული კომიტეტების სხდომაზე ეტაპობრივად მთელი დღის განმავლობაში გაგრძელდება.

ძველი მთავრობისა და ახალი პრემიერის დამტკიცების შემდეგ, პარლამენტი სტრუქტურულ ცვლილებებს განახორციელებს, რაც იმას ნიშნავს, რომ სამინისტროების რაოდენობა 14-დან 11-მდე შემცირდება და უკვე სამი კვირის შემდეგ, მამუკა ბახტაძე განახლებულ მთავრობას წარადგენს.