თბილისის მერის, კახა კალაძის თქმით, მმართველ გუნდში არის მოსაზრებები, რომ მინისტრთა კაბინეტი კიდევ უფრო უნდა შემცირდეს.

"არის მოსაზრებები, რომ მინისტრთა კაბინეტი კიდევ უფრო შემცირდეს. მე არ მინდა მოვლენებს გავასწრო, ალბათ, ბატონი მამუკა [ბახტაძე] თავადვე გააკეთებს ამასთან დაკავშირებით განცხადებას", - განაცხადა მერმა იმედის ეთერში.

პრემიერ-მინისტრობის კანდიდატად დასახელების შემდეგ, შვიდდღიან ვადაში მამუკა ბახტაძემ უნდა ჩამოაყალიბოს მთავრობის შემადგენლობა და პარლამენტს ნდობის მისაღებად უნდა წარუდგინოს. მან ასევე უნდა წარადგინოს სამთავრობო პროგრამაც.

ამის შემდეგ, კიდევ შვიდი დღის განმავლობაში, პარლამენტმა ეს ყველაფერი უნდა განიხილოს და კენჭი უყაროს. მაქსიმუმ 21 დღეში ახალი მთავრობა უნდა შეიქმნას.

ქართული ოცნების მმართველობის პერიოდში მესამე პრემიერ-მინისტრმა გიორგი კვირიკაშვილმა 13 ივნისს პრემიერ-მინისტრის თანამდებობა დატოვა. საქართველოს კონსტიტუციის თანახმად, პრემიერის გადადგომასთან ერთად, მთავრობის შემადგენლობაც გადამდგარად ითვლება.

2017 წლის ნოემბერში სამთავრობო ცვლილებების შედეგად, რამდენიმე სამინისტრო გაერთიანდა, ხოლო ზოგიერთი გაუქმდა.