მმართველი პარტია ქართული ოცნება ოზურგეთის საკრებულოში მომხდარ ინციდენტს, ენმ-ის წევრის ცემაზე, "პროვოკაციას" უწოდებს:

"როგორც ჩანს, ნაციონალური მოძრობა პოლიტიკურ პროცესებში მონაწილეობის ერთადერთ გზად დესტრუქციულ მეთოდებს ირჩევს".

ქართული ოცნება აღნიშნავს იმასაც, რომ ემიჯნებიან ძალადობის ნებისმერ გამოვლინებას:

"პროვოკაციების მიუხედავად, დაუშვებლად მიგვაჩნია ფიზიკური დაპირისპირება. საქართველო სამართლებრივი სახელმწიფოა და ყველა ის ადამიანი, რომელიც კანონს დაარღვევს, სათანადოდ აგებს პასუხს, მიუხედავად მისი პოლიტიკური, თუ თანამდებობრივი პოზიციისა".

პარტია აცხადებს, რომ ყველა მსგავს ინციდენტზე შესაბამისი სამსახურები მოახდენენ ადეკვატურ რეაგირებას:

"მივმართავთ ჩვენი პოლიტიკური ორგანიზაციის წევრებს, მხარდამჭერებს - ჩვენ მაღალი პოლიტიკური პასუხისმგებლობა გვაკისრია და ჩვენი ხელწერა ყოველთვის იყო და იქნება მხოლოდ კანონისმიერი პასუხი ყველა პროვოკაციაზე. ამიტომ, ყველას მოგიწოდებთ, არ აჰყვეთ არანაირ პროვოკაციას. ნურავის მივცემთ საშუალებას, ხელოვნურად მოახერხონ სიტუაციის ესკალაცია. აქვე, გვსურს აღვნიშნოთ, რომ არსებობს საჯარო სივრცეში მიზანმიმართული მუქარისა და შეურაცხყოფის არაერთი ფაქტი, რომელიც აუცილებლად გადაეცემა სამართალდამცავ უწყებებსა და საერთაშორისო ორგანიზაციებს".

ოზურგეთის საკრებულოს ნაციონალური მოძრაობის წევრი, ბესო ქათამაძე აცხადებს, რომ ის ქართული ოცნების წევრებმა სცემეს. როგორც On.ge-ს ენმ-ის ოზურგეთის ორგანიზაციის თავმჯდომარემ, დავით მჟავანაძემ განუცხადა, ქათამაძეზე ფეისბუქპოსტების გამო ფიზიკურად იძალადეს. მისივე თქმით, ქათამაძეს ბლაგვი საგნებით შეიარაღებული პირები სცემდნენ და რკინის საგანს ურტყამდნენ თავში.

საქმეზე გამოძიება საქართველოს სისხლის სამართლის კოდექსის 126-ე მუხლის პირველი ნაწილით მიმდინარეობს, რაც ცემას ან სხვაგვარ ძალადობას გულისხმობს. მუხლი ისჯება ჯარიმით ან საზოგადოებისათვის სასარგებლო შრომით ვადით ას ოციდან ას ოთხმოც საათამდე, ან შინაპატიმრობით ვადით ექვსი თვიდან ერთ წლამდე, ანდა თავისუფლების აღკვეთით ვადით ერთ წლამდე.