სასკოლო ექსკურსიებთან დაკავშირებით რეგულაციები გამკაცრდება. ამის შესახებ ინფორმაციას საქართველოს განათლების სამინისტრო ავრცელებს.

განცხადებაში ნათქვამია, რომ საქართველოს განათლებისა და მეცნიერების მინისტრის მოადგილის, ლია გიგაურის თქმით, ექსკურსიებს ძალიან დიდი საგანმანათლებლო მნიშვნელობა მიენიჭება.

გიგაურის თქმით, ამ კუთხით პროგრამები გაგრძელდება, თუმცა უსაფრთხოების ნორმები მკვეთრად გაძლიერდება.

"ახალი მიდგომით, სკოლას დაევალება, გადამყვანი კომპანიისგან მოითხოვოს მძღოლის კვალიფიკაციისა და ავტომანქანის ტექნიკური გამართულობის დამადასტურებელი დოკუმენტები. გარდა ამისა, ექსკურსია საგანმანათლებლო დაწესებულების მიერ იქნება ორგანიზებული თუ მშობელთა ინიციატივით, აუცილებელი გახდება სკოლა დაგეგმილ ექსკურსიაზე საქმის კურსში იყოს", - განაცხადა ლია გიგაურმა.

მისი განცხადებით, აუცილებელი იქნება ჯგუფის შემადგენლობაში სრულწლოვანი პირი შედიოდეს, რომელსაც პირველადი სამედიცინო დახმარების კურსი ექნება გავლილი.

განათლების სამინისტროს ინფორმაციით, დღეის მდგომარეობით, ექსკურსიებთან დაკავშირებით საქართველოს განათლებისა და მეცნიერების სამინისტროს, კულტურისა და სპორტის სამინისტროსა და შრომის, ჯანმრთელობისა და სოციალური დაცვის სამინისტროს მიერ შემუშავებული რეკომენდაციები მოქმედებს. თუმცა მხოლოდ იმ შემთხვევაში ვრცელდება, როდესაც ორგანიზატორი რომელიმე ინსტიტუცია, მაგალითად, საჯარო, კერძო, სახელოვნებო, სპორტული და ა.შ. სკოლა და დაწესებულებაა.

"თვითორგანიზებულ ექსკურსიებზე არსებული რეგულაცია ამ დრომდე არ ვრცელდებოდა", - ნათქვამია განცხადებაში.

სასკოლო ექსკურსიების დროს უსაფრთხოების საკითხებზე საუბარი დღის წესრიგში მას შემდეგ დადგა, რაც გომბორზე მიკროავტობუსი ხევში გადავარდა და ოთხი ადამიანი დაიღუპა, მათ შორის ერთი არასრულწლოვანი. ეკონომიკის სამინისტროს სახმელეთო ტრანსპორტის სააგენტოს ხელმძღვანელის მიხეილ ხმალაძის ინფორმაციით, მიკროავტობუსს, რომელიც 9 ივნისს გომბორის უღელტეხილზე ავარიაში მოყვა სავალდებულო ტექდათვალიერება გავლილი არ ჰქონდა და დარღვეული იყო მგზავრთა ლიმიტი.