სამხრეთ ოსეთის დე ფაქტო რესპუბლიკის პრეზიდენტმა, ანატოლი ბიბილოვმა განაცხადა, რომ კავკასიის რეგიონში სამხრეთ ოსეთი მუდმივად იყო რუსეთის საიმედო პარტნიორი. ინფორმაციას ამის შესახებ სახელისუფლებო გამოცემა რესი ავრცელებს.

ცხინვალში რუსეთის დღისადმი მიძღვნილი ღონისძიება გაიმართა. დე ფაქტო რესპუბლიკაში რუსეთის ელჩმა, მარატ კულახმეტოვმა განაცხადა, რომ სამხრეთ ოსეთის მოქალაქეების 95 პროცენტი რუსეთის მოქალაქეებიც არიან. ანატოლი ბიბილოვს მიაჩნია, რომ რუსეთთან უერთიერთობა ცხინვალის რეგიონის განვითარებაზე გავლენას ახდენს.

"ჩვენ მადლობელი ვართ ყველა იმ ადამიანის, რომელმაც სამხრეთ ოსეთის ბედში მიიღო მონაწილეობა. რა თქმა უნდა, ჩვენი პარტნიორობა ერთმხრივი არ არის", - განაცხადა ბიბილოვმა.

29 მაისს სირიამ ოკუპირებული ტერიტორიები დამოუკიდებელ და სუვერენულ სახელმწიფოებად აღიარა. სირიის საგარეო საქმეთა სამინსიტროს განცხადებაში წერია, რომ აფხაზეთმა და ოსეთმა სირიის წინააღმდეგ მიმართული ტერორისტული აგრესია აღიარეს, სწორედ ამიტომ, მადლობის ნიშნად, სირიამ ისინი დამოუკიდებელ სახელმწიფოებად აღიარა.

აღიარების საპასუხოდ საქართველომ სირიასთან დიპლომატიური ურთიერთობები გაწყვიტა. სამხრეთ ოსეთისა და აფხაზეთის დე ფაქტო რესპუბლიკები მანამდე აღიარეს რუსეთმა, ნიკარაგუამ, ნაურუმ და ვენესუელამ.