ხორავას ქუჩაზე მკვლელობის ადგილზე ექსპერტ-კრიმინალისტები მუშაობენ. ამის შესახებ ინფორმაციას ტელეკომპანია პირველი ავრცელებს. სამართალდამცველები იმ ადგილს ათვალიერებენ, სადაც პირველ დეკემბერს მკვლელობა მოხდა.

შინაგან საქმეთა სამინისტროს ინფორმაციით, ხორავას ქუჩაზე მოკლული ორი მოზარდის საქმეზე მოწმეზე ზემოქმედების ბრალდებით 1973 წელს დაბადებული მერაბ მორჩაძე დააკავეს. ამის შესახებ On.ge-ს უწყებიდან რამდენიმე წუთის წინ აცნობეს.

"მერაბ მორჩაძის დაკავება განხორციელდა მკვლელობის ძირითადი საქმიდან გამოყოფილი იმ სისხლის სამართლის საქმის ფარგლებში, რომელზეც გამოძიებას შინაგან საქმეთა სამინისტრო აწარმოებს", - აღნიშნულია შსს-ს მიერ On.ge-სთვის მიწოდებულ ინფორმაციაში.

მორჩაძე სისხლის სამართლის კოდექსის 372-ე მუხლით დააკავეს. ამ მუხლით, სისხლის სამართლის პასუხისმგებელობისთვის პირს მოწმეზე ზემოქმედებისთვის ეკისრება.

ხორავას ქუჩაზე მოკლული მოზარდების საქმეზე სასამართლომ განაჩენი 31 მაისს გამოაცხადა. სასამართლოს გადაწყვეტილებით, ცნობილი გახდა, რომ პროკურატურას დავით სარალიძის მკვლელი დაკავებული არ ჰყავდა. ამ განაჩენის გამოცხადების შემდეგ დავით სარალძის მამამ დაიწყო აქციები, ქუჩაში რამდენიმე ათეული ათასი ადამიანი გამოვიდა. მოგვიანებით გარდაცვლილის მამამ, ზაზა სარალიძემ მთავრობას ამ საქმეში მონაწილე პირების დასაკავებლად ვადა 10 ივნისამდე მისცა.