ხულიგნობის ბრალდებით დაკავებული ნეონაცისტური ქართული მარშის წევრმა, ლადო სადღობელაშვილმა სასმართლოში ფიცი დადო, რომ აღარ გაიმეორებს იმას, რის გამოც არის დაკავებული. ასე ითხოვდა აღკვეთის ღონისძიებად, პატიმრობის ნაცვლად, გირაოს შეფარდებას.

"ვფიცავ ღმერთის წინაშე, რომ მომდევნო პერიოდის განმავლობაში მე არაფერს ისეთს არ ჩავიდენ, რის გამოც, მე ვიყო იმის ღირსი, რომ თუნდაც, ადმინისტრაციული დავარღვიო", - ეუბნებოდა ის მოსამართლეს.

სასმართლომ მას და კიდევ ოთხ პირს აღკვეთის ღონისძიება პატიმრობა გირაოთი შეუცვალა, თუმცა ორის მიმართ გადაწყვეტილება არ შეცვალა.

19 მარტს ნეონაცისტური დაჯგუფების, ქართული მარშის წევრებმა ტელეკომპანია რუსთავი 2-თან აქცია გამართეს. მათ მიაჩნიათ, რომ ტელეწამყვანმა გიორგი გაბუნიამ მორწმუნეთა "რელიგიურ გრძნობებს" შეურაცხყოფა მიაყენა, როცა 18 მარტს გადაცემა P.S.-ში იესო ქრისტეს ჯვარცმაზე ისაუბრა.

აქციაზე ქართული მარშის წევრებმა, რუსთავი 2-ის ჟურნალისტს დავით ერაძეს სცემეს. მათ რუსთავი 2-ის იურისტის, თამთა მურადაშვილის მანქანას, რომელშიც გიორგი გაბუნიაც იჯდა, ალყა შემოარტყეს. პოლიციამ ქართული მარშის ექვსი წევრი დააკავა. მათ ბრალი ხულიგნობისა და ძალადობის მუხლით წარუდგინეს.

თბილისის საქალაქო სასამართლომ ქართული მარშის 6 წევრს აღმკვეთი ღონისძიების სახით პატიმრობა შეუფარდა, რის შემდეგაც მარშის წევრებმა "სასიკვდილო შიმშილობა" გამოაცხადეს.