მომხმარებლების შენიშვნებისა და უკმაყოფილების შემდეგ, ეიჩ ენდ ემი ქალების ტანსაცმლის ზომებს გაზრდის. მაგალითად, ის სამოსი, რაც ადრე 12 ზომად ითვლებოდა, 10 ზომად განისაზღვრება.

მომხმარებლები ამბობდნენ, რომ H&M-ის ზომები სხეულის ზომებთან შედარებით არარეალურად პატარა იყო. მარტში, ბლოგერმა რებეკა პარკერმა ღია წერილი გამოაქვეყნა, სადაც ამბობდა, რომ იმის მიუხედავად, რომ 12 ზომის იყო, H&M-ის 14 ზომის ჯინსი არ ერგებოდა.

"რატომ არქმევენ ტანსაცმელს იმ ზომას, რაც ის რეალურად არ არის?" - წერდა ის.

მისი თქმით, H&M-ის პროდუქცია ხშრად იყო გამდიდრებული ფემინისტური წარწერებით, თუმცა თავად ბრენდის პოლიტიკა ქალების გაძლიერებას არ ემსახურებოდა.

რებეკა დასძენს, რომ ის უკვე 25 წლისაა და მოვლენებს სწორად აფასებს, თუმცა, თინეიჯერობის ასაკში, მისი რეაქცია სხვანაირი იქნებოდა, თუ ბრენდის სტანდარტებით მისი სხეულის ზომა იმაზე დიდად განისაზღვრებოდა, ვიდრე რეალურად იქნებოდა.

მომხმარებლები H&M-ის ზომების შესახებ უკმაყოფილებას ტვიტერზეც გამოთქვამდნენ:

"როდის მიხვდება H&M ისეთი ტანსაცმელი შეკეროს, რომელიც 12 ზომის ადამიანს მოერგება? დავიღალე 16 ზომის ტანისამოსის ჩაცმით. ნუთუ 12 ზომის ადამიანებს უკანალისა და მკერდის ქონის უფლება არ აქვთ?"