დეკანოზი, რომლის შვილიც რუსთავი 2-ის მიერ გავრცელებული ინფორმაციით, დავით სარალიძის მკვლელობის საქმეში ფიგურირებდა, ხორავას ქუჩაზე მომხდარს ფეისბუქის საკუთარ გვერდზე ეხმაურება.

ის წერს, რომ ტრაგედიის პირველივე დღიდან მისი შვილი თანამშრომლობს გამოძიებასთან:

"ხუთი თვის განმავლობაში მრავალგზის იყო დაკითხვაზე, მათთან ერთად ვიყავით მშობლებიც და, რა თქმა უნდა, შევხვდით გარდაცვლილების მშობლებსაც და ვუპასუხეთ მათ შეკითხვებს.

დეკანოზი მიმართავს საზოგადოებას, თავი შეიკავონ ცილისწამებისგან, რადგან მისივე თქმით, ეს შესაძლოა, ახალგაზრდებს შორის ახალი დაპირისპირების მიზეზი გახდეს:

"იმედი მაქვს, გაირკვევა სიმართლე და თუ ობიექტური გამოძიებით ჩემი შვილის ბრალეულობა დადასტურდება, მან ჩადენილი დანაშაულის გამო, კანონის შესაბამისად, აუცილებლად უნდა აგოს პასუხი, რაც, პირველ რიგში, მისი სულისათვის იქნება სასარგებლო. ღრმა მწუხარებას გამოვხატავ ხორავას ქუჩაზე მომხდარი საშინელი ფაქტის გამო".

დეკანოზი უარყოფს, რომ თითქოს არსებულ მოვლენებთან დაკავშირებით მოსაზრება აქციაზე დააფიქსირა:

"ტაძრის ამბიონის გარდა, ამ თემაზე საჯაროდ არსად მისაუბრია, მეტიც, არ ვყოფილვარ არცერთ შეკრებაზე და მით უმეტეს, არ ვარ რაიმე კავშირსა თუ დაჯგუფებაში გაერთიანებული.

ის ასევე აღნიშნავს, რომ არ ცდილობს მისი შვილის პროცესებისგან განრიდებას და ამისთვის არც ეკლესიის გავლენა გამოუყენებია:

"ასეთი რამ ჩემთვის, როგორც ქრისტიანისთვის, მითუმეტეს, სასულიერო პირისთვის, ყოვლად მიუღებელია".

ტელეკომპანია იმედის ინფორმაციით, დეკანოზმა 3 ივნისს, ქადაგების დროსაც განაცხადა, რომ მის შვილს ხელში დანა არ ეჭირა.

ტელეკომპანია რუსთავი 2-მა ხორავას ქუჩის საქმეზე სასამართლო პროცესის აუდიოჩანაწერი გაასაჯაროვა, სადაც მოწმე ყვება, რომ დავით სარალიძეს ერთ-ერთი დეკანოზის შვილი ფარდულში გაურკვეველ ნივთს ურტყამდა. დავით სარალიძე ამ დღეს მიყენებული ჭრილობებით გარდაიცვალა.

"ზაზა სარალიძე დარწმუნებულია, რომ მის შვილს ჭრილობა მ-მ [სასულიერო პირის შვილი] მიაყენა. ის აცხადებს, რომ ეს ინფორმაცია მან პროკურატურას ჯერ კიდევ სამი თვის წინ მიაწოდა, თუმცა, უწყებაში მას კონკრეტული მტკიცებულებები მოსთხოვეს, რადგან პროკურატურაში განუცხადეს, რომ არასრულწლოვანს ვერ დააკავებდნენ მტკიცებულებების გარეშე", - ამ ინფორმაციას რუსთავი 2 ავრცელებდა.