ჩიკაგოში გამართულ კონცერტზე, ქანთრისა და პოპის მომღერალმა, ტეილორ სვიფტმა, პრაიდის თვის აღსანიშნავად, ლგბტ ფანებს მიმართა. სანამ ახალი ალბომიდან თავის ერთ-ერთ ყველაზე პოპულარულ სინგლს, Delicate-ს შეასრულებდა, 28 წლის მუსიკოსმა ფანებს თანადგომა გამოუცხადა და ემოციური მესიჯით მიმართა:

"ძალიან მამაცურია, როცა რთულ სიტუაციებში შენს გრძნობებს აღიარებ და კიდევ უფრო მამაცი ხარ, როცა გულწრფელი ხარ, როცა საკუთარ გრძნობასა და სიყვარულზე საუბრობ, თუნდაც იცოდე, რომ ამან შესაძლოა საზოგადოებაში განსხვავებული რეაქციები გამოიწვიოს.

ასე რომ, ამ თვეში და ყველა თვეში, მინდა იცოდეთ, რომ მიყვარხართ და პატივს გცემთ ყველას, ვინც საკმარისი სიმამაცე გამოიჩინეთ, როცა გულწრფელები იყავით თქვენს გრძნობებზე, როცა გაბედეთ ისე გეცხოვრათ, როგორც გსურდათ.

ესაა თვე, როცა ჩვენ უნდა ვიზეიმოთ, თუ რამდენი შევძელით და უნდა გავიაზროთ, კიდევ რამხელა გზა გვაქვს გასავლელი. მინდა მათაც გავუზიარო ჩემი სიყვარული და პატივისცემა, ვინც ქამინგაუთისთვის თავს საკმარისად კომფორტულად ჯერ არ გრძნობს. ამისთვის ყველას თავისი პირადი დრო აქვს.

იმედი მაქვს, ვიცხოვრებთ სამყაროში, სადაც სხვა ყველაფერთან ერთად, სიყვარულშიც თანასწორები ვიქნებით და არავის შეეშინდება, საკუთარი გრძნობების.

როდესაც საქმე გრძნობებს ეხება და სიყვარულისა და იმ ადამიანის ძიებას, ვისთანაც მთელი ცხოვრების გატარება გსურს, ეს ძალიან დელიკატური საკითხი ხდება. ხომ იცით?"

ტეილორის კონცერტზე, მოედანზე ცისარტყელის ფერების განათება გადადიოდა.