პრემიერმა გიორგი კვირიკაშვილმა ბრიფინგზე განაცხადა, რომ ხვალიდან, პირველი ივნისიდან შსს დაიბრუნებს ხორავას ქუჩაზე მომხდარი არასრულწლოვნების მკვლელობის საქმეს პროკურატურისგან. მისივე თქმით, ვიცე-პრემიერი გიორგი გახარია წაიყვანს გამოძიების პროცესს.

მთავარი პროკურორი, ირაკლი შოთაძე დღეს გადადგა. შოთაძის განცხადებით, მისთვის, როგორც საქართველოს მთავარი პროკურორისთვის, უმნიშვნელოვანესია თითოეული მოქალაქის ნდობა სახელმწიფო ინსტიტუტების, განსაკუთრებით კი პროკურატურის მიმართ.

ხორავას ქუჩაზე მოკლული არასრულწლოვნების მკვლელობის ობიექტურად გამოძიების მოთხოვნით გამართულ აქციაზე, პარლამენტის წინ, გიორგი კვირიკაშვილი მივიდა. აქციის მონაწილეებმა პრემიერს ბოთლები ესროლეს, რის შემდეგაც ის დაცვამ უკან გაიყვანა. აქციის მონაწილეები სკანდირებდნენ "წადი".

მათი ერთ-ერთი მთავარი მოთხოვნაა გადადგეს მთავრობა. მათ პრეზიდენტს მოუწოდეს, რომ შეუერთდეს აქციას და გადაააყენოს მთავრობა.

ირაკლი შოთაძის გადადგომას ხორავას ქუჩაზე მოკლული დავით სარალიძის მამა, ზაზა სარალიძე ითხოვდა. მას შემდეგ, რაც დღეს, 31 მაისს თბილისის საქალაქო სასამართლომ ხორავას ქუჩის საქმეზე ერთი ბრალდებული სარალიძის ნაწილში გაამართლა, ხოლო მეორე ბრალდებულს მუხლი შეუცვალა სარალიძემ პროკურატურასთან აქცია გამართა.