რუსეთის საგარეო საქმეთა მინისტრმა სერგეი ლავროვმა დღეს განაცხადა, რომ საქართველოსა და რუსეთს შორის, დიპლომატიური ურთიერთობის აღსადგენად, ინიციატივა თბილისისგანაც უნდა მოდიოდეს, რადგან მოსკოვი ერთადერთი არაა, ვინც წარსულში დამაკავშირებელი "ძაფები დააშორა". ინფორმაციას რუსული სააგენტო Tass ავრცელებს.

"ამჟამად ჩვენ არ გვაქვს საელჩო საქართველოში, არც საქართველოს აქვს საელჩო მოსკოვში, თუმცა შვეიცარიის კონფედერაციის საელჩოში ფუნქციონირებს ინტერესების სექცია" - განაცხადა ლავროვმა ეროვნულ საგანმანათლებლო ახალგაზრდულ ფორუმზე.

რუსეთის საგარეო საქმეთა მინისტრმა ორი ქვეყანას შორის ურთიერთობის გაუარესება საქართველოს ყოფილ პრეზიდენტს, მიხეილ სააკაშვილს, დაუკავშირა:

"ეს ყოველივე მოხდა, რადგან საქართველოს მთავრობამ, მიხეილ სააკაშვილის ხელმძღვანელობით, გაწყვიტა დიპლომატიური კავშირი რუსეთთან, სიტუაცია მხოლოდ დიპლომატიური ურთიერთობების აღდგენით გაუმჯობესდება, რადგანაც ჩვენ არ ვართ ერთადერთი მხარე, ვინც ურთიერთობის გაუარესებაზე იქონია გავლენა, ქმედებებს ჩვენი ქართველი მეზობლებისგან ველოდებით".

ლავროვის თქმით, ის დარწმუნებულია, რომ ორი ქვეყანა ერთად "ყველა პრობლემას გადაჭრის" და ახლა მათ ურთიერთობაში "უფრო მეტი შეგნება იგრძნობა".

რუსეთის საგარეო საქმეთა მინისტრმა ასევე გაიხსენა აბაშიძე-კარასინის რეგულარული შეხვედრები და საუბრის შესაძლებლობები, რომლებიც თბილისი-მოსკოვის ურთიერთობას აჯანსაღებს.

აბაშიძე-კარასინის შეხვედრა 2008 წლის აგვისტოს ომის შემდეგ დიალოგის პირველი მცდელობაა საქართველო-რუსეთის ოფიციალურ პირებს შორის და ის 2012 წლიდან ყოველ 4 თვეში ერთხელ იმართება.

საქართველოსა და რუსეთს შორის დიპლომატიური ურთიერთობა 2008 წლის აგვისტოს რუსეთ-საქართველოს ომის შემდეგ შეწყდა.