საქართველოს პარლამენტის ადამიანის უფლებათა კომიტეტის თავმჯდომარის სოფო კილაძის განცხადებით, ხორავას ქუჩაზე მოკლული არასრულწლოვნის მამას ზაზა სარალიძეს თბილისში კომიტეტის ფარგლებში შეხვდებიან.

სოფო კილაძის თქმით, ისინი მოისმენენ ზაზა სარალიძის კითხვებს და სამართლებრივადაც გვერდით დაუდგებიან.

"ეს არ არის მხოლოდ ოჯახის ტრაგედია. ეს არის საზოგადოების ტრაგედია, როცა ხდება ასეთი სისასტიკე ახალგაზრდების მხრიდან, ჩვენი როგორც სახელმწიფოს პასუხისმგებლობაა დავადგინოთ ობიექტური ჭეშმარიტება და საზოგადოებასაც გავაცნოთ რა მოხდა კითხვის ნიშნებს, რომელიც აქვს საზოგადოებას და მამას პასუხი უნდა გაეცეს", - განაცხადა სოფიო კილაძემ პარლამენტის პლენარულ სხდომაზე.

მისი თქმით, შემთხვევის თვითმხილველ ბავშვებს, რომ გამოძიებასთან ეთანამშრომლათ დღეს ზაზა სარალიძეს კითხვები არ ექნებოდა.

ხორავას ქუჩაზე მოკლული არასრულწლოვნის მამამ ზაზა სარალიძემ 27 მაისს საქართველოს პარლამენტთან აქცია #ნუმომკლავ გაამართა. მან უნდობლობა გამოუცხადა პროკურატურას და სამართლიანობა მოითხოვა. ზაზა სარალიძე აცხადებს, რომ თუ ხორავას ქუჩაზე მომხდარი მკვლელობის ფაქტი არ გამოაშკარავდება და ყველა დამნაშავე არ დაისჯება, უფრო მასშტაბური აქციებით გააგრძელებს პროტესტს.