კომპანია დირსი 2011 წელს ერთ ლარად ნაყიდი ტერიტორიის ნახევარზე დენდროპარკის ნაცვლად კორპუსებს ააშენებს. ამის შესახებ გადაწყვეტილება თბილისის მერმა კახა კალაძემ 3 მაისის მთავრობის სხდომაზე მიიღო და შესაბამისი განკარგულება გამოსცა.

საუბარია, იმ ხელშეკრულების ცვლილებაზე, რომელიც კომპანიასა და მთავრობას შორის 2011 წელს გაფორმდა. ას ჯორჯიას სიმბოლურ 1 ლარად 15 ჰექტარი დენდროლოგიური პარკის მოსაწყობად გადაეცა. ახალი შეთანხმებით კი მას ნახევარ ტერიტორიაზე სკვერის, მეორე ნახევარზე კი კორპუსების მშენებლობის ვალდებულება ექნება. საკითხი საკრებულოს სხდომაზეც განიხილეს და დირსს 7,5 ჰექტარზე კორპუსების აშენების უფლება ოფიციალურად მიეცა.

გადაწყვეტილებას პროტესტი მოჰყვა საკრებულოს ნაციონალური მოძრაობის დეპუტატების მხრიდან. დეპუტატმა ლევან ხაბეიშვილმა გამოძიების დაწყების მოთხოვნით პროკურატურას უკვე მიმართა.

ის ვარაუდობს, რომ თბილისის მერის კახი კალაძის გადაწყვეტილებით, მერიამ მნიშვნელოვანი ფინანსური მოგება ნახა.

თბილისის მერიის ქონების მართვის სამსახურის უფროსის ირაკლი თავართქილაძის განმარტებით, კი მერიამ მიიღო საუკეთესო გადაწყვეტილება და ხელშეკრულება, რომელიც გაუქმების საფრთხის წინაშე იდგა, გააცოცხლეს.

მისი თქმით, 2011-2012 წლებში კომპანია დირსთან ხელშეკრულებები გაფორმდა. ერთი იყო სამშენებლო ნაწილი, ხოლო მეორე ხელშეკრულება 1 ლარად გადაცემულ 15 ჰექტარზე ვრცელდებოდა. ხელშეკრულებით, დირსმა აიღო ვალდებულება რომ ერთ ლარად გადაცემულ 15 ჰექტარზე დენდროლოგიურ პარკს მოაწყობდა. ამ პროექტში კომპანიას 3 მილიონი აშშ დოლარი უნდა დაეხარჯა. კომპანიამ ამ ვალდებულების შესრულების უზრუნველსაყოფად ქონების მართვის სააგენტოში საბანკო გარანტია 300 000 აშშ დოლარის ოდენობით წარმოადგინა.

ირაკლი თავართქილაძის თქმით, როცა ქართული ოცნება ხელისუფლებაში მოვიდა დირსთან მოლაპარაკებები დაიწყო.

"კომპანიისთვის ეს კონტრაქტი, რომელიც მხოლოდ და მხოლოდ ვალდებულებით ჰქონდა დატვირთული, ფინანსურად მომგებიანი არ იყო და ამბობდა, რომ ამ პროექტის განხორციელების ინტერესი არ ჰქონდა", - უთხრა On.ge-ს ირაკლი თავართქილაძემ.

თავართქილაძის თქმით, კომპანია მზად იყო ვალდებულებაზე უარი ეთქვა და ჯარიმა გადაეხადა.

"ჩვენ ვცადეთ ხელშეკრულების გაცოცხლება და გადავწყვიტეთ, კომპანიისთვის მიგვეცა ინტერესი, რომ ეს 3 მილიონი დოლარი მაინც დაეხარჯა. ჩვენ გადავწყვიტეთ, რომ 15 ჰექტარი ორ ნაწილად გაგვეყო 7,5 ჰექტარზე დენდროლოგიური პარკი აშენდება და დაიხარჯება 3 მილიონი აშშ დოლარი, დანარჩენ 7,5-ზე კი ბინები აშენდება", - განმარტავს ირაკლი თავართქილაძე.

მისივე თქმით, ვინაიდან, ტერიტორია სიმბოლურ ფასად იყო გასხვისებული მხარეები შეთანხმდნენ, რომ 7,5 ჰექტარზე გაშენებული საცხოვრებელი ფართის 6,5% მერიას გადმოეცემა.