შინაგან საქმეთა სამინისტრომ ბასიანსა და გალერიში ჩატარებული სპეცოპერაციის ღამეს ნარკოდანაშაულის ბრალდებით დაკავებულებზე მტკიცებულებების გასაჯაროების საქმეს იძიებს. მტკიცებულებები რუსთავი 2-ის ეთერში 26 მაისს გასაჯაროვდა.

რუსთავი 2-მა 26 მაისს კლუბ ბასიანისა და გალერის საქმის დოკუმენტები და სატელეფონო ჩანაწერები გამოაქვეყნა, ასევე, გაასაჯაროვა მოწმეების ვინაობა, რაც, შსს-ს განცხადებით, მათთვის საფრთხის შემცველი შეიძლება იყოს.

საქმის მონაწილე მხარეებს გაუთქმელობაზე აქვთ ხელი მოწერილი, რაც იმას ნიშნავს, რომ ამ საკითხზე საუბრისა და ინფორმაციის გავრცელების უფლება აქვთ შეზღუდული.

ამავე საქმეზე მტკიცებულებები გაავრცელა ტელეკომპანია იმედმაც. ორივე შემთხვევაში გამოძიება სისხლის სამართლის კოდექსის 374-ე მუხლით დაიწყო. ამ მუხლით, ოპერატიულ-სამძებრო საქმიანობის მასალების ან გამოძიების მონაცემის გახმაურება იმის მიერ, ვინც კანონით დადგენილი წესით გაფრთხილებული იყო მისი გახმაურების აკრძალვის შესახებ ისჯება ჯარიმით ან გამასწორებელი სამუშაოთი ვადით ორ წლამდე ანდა თავისუფლების აღკვეთით ვადით ერთ წლამდე.

ამავე თემაზე: შსს: ნარკოდანაშაულისთვის ბრალდებული 8 პირის საქმის მტკიცებულებების გასაჯაროვებისთვის გამოძიება დაიწყო