ზუგდიდის მერმა, ლაშა გოგიამ დაადასტურა, რომ სტატუსი, რომლითაც ბიზნესს რუსთავი 2-ის ბოიკოტირებისკენ მოუწოდებს დაწერა და შემდეგ წაშალა.

გოგია ფეიქბუქზე წერს, რომ აღნიშნული სტატუსი მხოლოდ მის პირადი პოზიციაა და ქართული ოცნების მოსაზრებას არ გამოხატავს:

"ვწუხვარ, თუ ეს ჩემი პირადი, ემოციური პოსტი აღქმული იქნა გამოხატვის წინააღმდეგ მიმართულ ნაბიჯად. (სწორედ ამიტომ წავშალე ეს სტატუსი ჩემი პირადი ფბ გვერდიდან).
ჩვენს ქვეყანაში სიტყვისა და აზრის გამოხატვის უფლება თავისუფალია და მეც, როგორც მოქალაქეს მაქვს ამის უფლება".

რუსთავი 2-ის გენერალურმა დირექტორმა ნიკა გვარამიამ ფეისბუქზე 25 მაისს გაავრცელა ლაშა გოგიას სტატუსის სქრინი, სადაც გოგია კოპანიებს მოუწოდებს, რომ საპატრიარქოს ბოიკოტს მხარი დაუჭირონ და და რუსთავი 2-ზე რეკლამა არ განათავსონ.

გოგია უარყოფდა, რომ სტატუსი მან დაწერა, მაგრამ On.ge-სთან სატელეფონო საუბარში განაცხადა, რომ მსგავსი შეინაარსის ტექსტს ეთანხმება.

"სანამ რუსთავი 2 სწორი ინფორმაციის გვარცელებას არ დაიწყებს, მანამდე ვეთანხმები".

გუშინ, 24 მაისს, საქართველოს მართლმადიდებელი ეკლესიის საპატრიარქომ სასულიერო პირებსა და თავიანთ მხარდამჭერებს მოუწოდა რუსთავი 2-თან ურთიერთობა შეწყვიტონ. ბოიკოტის შესახებ განცხადება საპატრიარქომ გიორგი გაბუნიას 22 მაისს გასული გადაცემის შემდეგ გაავრცელა. გადაცემის თემა "ცენზურის საფრთხე" და გამოხატვის თავისუფლების შესახებ ახალი საკანონმდებლო პაკეტი იყო. წამყვანს თვალსაჩინოებისთვის სტუდიაში მიტანილი ჰქონდა მხატვარ ლია უკლებას ნახატი "თვითმკვლელი ღვთისმშობელი", რომელსაც სათამაშო პისტოლეტი უჭირავს.

საპატრიარქოს განცხადებას მხარი დაუჭირა პატრიოტთა ალიანსმა და ბოიკოტი გამოუცხადა რუსთავი 2-ს.