ავსტრალიამ და ნიდერლანდებმა თვითმფრინავის ბოინგ-777-ის ჩამოგდებაში რუსეთი ოფიციალურად დაადანაშაულა.

როგორც განცხადებაშია ნათქვამი, ორივე მხარემ რუსეთს თავისი გადაწყვეტილების შესახებ უკვე შეატყობინეს.

გუშინ, 24 მაისს მკვლევარების საერთაშორისო ჯგუფმა პრესკონფერენციაზე განაცხადა, რომ ბუკის მოწყობილობა, რომლიდანაც ესროლეს თვითმფრინავს, რუსეთის სამხედრო ძალებს ეკუთვნოდა.

ბოინგ-777-ის ავიაკატასტროფა 2014 წელს უკრაინის თავზე მოხდა. კომპანია Malaysia Airlines თვითმფრინავი რეისით MH17 ამსტერდამიდან კუალა-ლამპურში მიფრინავდა. ბორტზე 298 ადამიანი იყო, ყველა მათგანი გარდაიცვალა. ბორტზე მყოფთაგან უმეტესობა ნიდერლანდების მოქალაქე იყო.

ასევე, გარდაიცვალნენ ავსტრალიის, მალაიზიის, დიდი ბრიტანეთის, ბელგიის, კანადის, ინდონეზიის, გერმანიის, ახალი ზელანდიისა და ფილიპინების მოქალაქეები.

რუსეთმა MH17-ის ავიაკატასტროფაში მონაწილეობა კიდევ ერთხელ უარყო. რუსეთის პრემიერ-მინისტრმა, ვლადიმერ პუტინმა საფრანგეთის პრეზიდენტთან, ემანუელ მაკრონთან მოლაპარაკებების შემდეგ განაცხადა, რომ საერთაშორისო გამოძიების შედეგებს იმ შემთხვევაში აღიარებს თუ გამოძიებაში თვითონაც მიიღებს მონაწილეობას.

"ჩვენდა გასაკვირად გამოძიებასთან არ გვიშვებენ. უკრაინული მხარე იქ მუშაობს მიუხედავად იმისა, რომ მან საერთაშორისო წესი დაარღვია და საბრძოლო მოქმედებების ადგილზე საჰაერო სივრცე არ დაკეტა", - განაცხადა პუტინმა.