საგანგებო მდგომარეობისა და ქვეყანაში მომხდარი სახელმწიფო გადატრიალების მცდელობის მიზეზით, თურქეთი დროებით შეაჩერებს ადამიანის უფლებათა ევროპული კონვენციის მიმართ აღებულ ვალდებულებებს. ამის შესახებ Hurriyet Daily News წერს თურქეთის ოფიციალურ წყაროზე დაყრდნობით.

პრემიერ მინისტრის მოადგილის ნუმან კურტულმუსის მტკიცებით, საფრანგეთმაც ასევე გამოაცხადა საგანგებო მდგომარეობა და მათაც შეაჩერეს ადამიანის უფლებათა ევროპული კონვენცია, ამავე კონვენციის მე-15 მუხლზე დაყრდნობით:

"საგანგებო მდგომარეობის დეკლარაცია არ ეწინააღმდეგება ადამიანის უფლებათა ევროპულ კონვენციას".

კონვენციის მე-15 მუხლის პირველი ნაწილი გულისხმობს:

"ომის ან სხვა საგანგებო მდგომარეობის დროს, როცა საფრთხე ემუქრება ხალხის სიცოცხლეს, ნებისმიერ მაღალ ხელშემკვრელ მხარეს შეუძლია გაატაროს ღონისძიებები კონვენციით ნაკისრი ვალდებულებების შესრულებისაგან გადახვევის მიზნით, მხოლოდ იმ ზომით, რამდენადაც ამას მკაცრად მოითხოვს მდგომარეობის სიმწვავე და იმ პირობით, რომ ეს ღონისძიებები არ ეწინააღმდეგება მხარის სხვა საერთაშორისო სამართლებრივ ვალდებულებებს".