შინაგან საქმეთა სამინისტროს განცხადებით, დღეს, 23 მაისს, გამოძიების მონაცემის გახმაურების გამო, სისხლის სამართლის კოდექსის 374-ე მუხლით გამოძიება დაიწყო. მათივე ცნობით, ტარდება საგამოძიებო მოქმედებები დანაშაულის ჩამდენ პირთა ვინაობის დასადგენად.

უწყების განმარტებით, გამოძიების დაწყებას საფუძვლად დაედო ნარკოტიკული საშუალებების უკანონო გასაღების ბრალდებით დაკავებული 8 პირის საქმეზე არსებული მტკიცებულებების გასაჯაროვება.

შსს-ს ცნობით, ერთ-ერთ მედიასაშუალებაში გამოქვეყნდა კლუბი გალერის დაცვის თანამშრომელსა და მენეჯერს შორის სატელეფონო საუბრის ჩანაწერი, რომელიც წარმოადგენს სისხლის სამართლის საქმეზე დართულ მტკიცებულებას:

"მიუხედავად იმისა, რომ სისხლის სამართლის საქმეში მონაწილე მხარეები გაფრთხილებული იყვნენ გამოძიების მონაცემის გაუხმაურებლობაზე შესაბამისი ხელწერილებით, მოხდა მტკიცებულებების გასაჯაროება".

აუდიო ჩანაწერი, სადაც, თითქოს, კაფე გალერის დაცვის უფროსი, ვიქტორ ჟამუტაშვილი და ამავე კლუბის დირექტორი საუბრობენ, დღეს, ტელეკომპანია იმედზე, ქრონიკის ეთერში გავიდა. ჩანაწერის ავთენტურობა ჯერ დადგენილი არაა, თუმცა, სავარაუდოდ, დაცვის უფროსი კაფე გალერის დირექტორს იმ საშიშ ნარკოტიკულ ნივთიერებაზე ესაუბრება, რომელმაც მათივე თქმით, კლუბ ბასიანზე ორი გოგოს სიცოცხლე შეიწირა.

ნარკორეალიზების ბრალდებით დაკავებულების ადვოკატებს გაუთქმელობაზე მოაწერინეს ხელი. ადვოკატი ხათუნა ხურცილავა იმედის ჟურნალისტთან საუბრისას ამბობს, რომ თუკი მსგავსი აუდიო ჩანაწერი მართლა არსებობს, ის აუცილებლად გამოიყენებს ამას არსებითი განხილვის დროს.

12 მაისს, გვიან ღამით კლუბ ბასიანსა და კაფე გალერიში სპეცოპერაცია ჩატარდა. როგორც შსს ამბობს, მათ რვა ნარკორეალიზატორი დააკავეს, თუმცა როგორც ირკვევა არც ერთი ბრალდებული კლუბის ტერიტორიაზე არ დაუკავებიათ.

გაიგეთ მეტი:

ბასიანსა და გალერიში ჩატარებული სპეცოპერაციის შედეგები - მოკლედ