ცეცხლთან თამაშს თავისი შედეგები მოჰყვება, რომელზეც პასუხისმგებლობაც მის გამომწვევებს ეკისრებათ.

ეს პასუხისმგებლობა ამერიკელ თინეიჯერს 36 მილიონი ამერიკული დოლარი დაუჯდა.

ორშაბათს, 21 მაისს, ორეგონის სასამართლომ 15 წლის ბიჭი ხანძრის გაჩენაში დამნაშავედ სცნო და ზარალის ასანაზღაურებლად, 36 618 338 დოლარის გადახდა დააკისრა.

თინეიჯერის სიტყვებით, 2017 წლის 2 სექტემბერს, ის ტყეში ყოფნისას ფეიერვერკებს უშვებდა, როცა ერთ-ერთი მათგანი ტყეს მოედო და ხანძარი გამოიწვია, რის შედეგადაც 19 424 ჰა ფართობის ტყე დაიწვა.

თინეიჯერის ადვოკატმა გადაწყვეტილებას აბსურდული უწოდა და თქვა, რომ მოსამართლემ ამ გადაწყვეტილებით, აშშ-სა და ორეგონის შტატის კონსტიტუცია დაარღვია, რომელიც ადამიანებს გადაჭარბებული ოდენობის ჯარიმისა და "ბოროტული, უჩვეულო სასჯელისგან" იცავს.

თუ თინეიჯერი ჯარიმას სრულად არ გადაიხდის, სასამართლო მას გადასახადის განაწილების გეგმას განუსაზღვრავს.

თებერვალში გამართულ სასამართლოზე, თინეიჯერმა ბოდიშიც მოიხადა. მაშინ სასამართლომ მას 5-წლიანი პირობითი და 1 920 საათით საზოგადოებისთვის სასარგებლო შრომა მიუსაჯა.

მოსამართლემ ასევე განაცხადა, რომ თუ მომავალი 10 წლის განმავლობაში, დაჯარიმებული პრობაციას წარმატებით დაასრულებს, არ ჩაიდენს დანაშაულს და გეგმით განსაზღვრულ თანხას ამ პერიოდში გადაიხდის, დარჩენილი ჯარიმისგან გათავისუფლდება.