პლატფორმა არა ფობიას! სასჯელაღსრულების მინისტრს, კახა კახიშვილს, შიდა აუდიტის სამსახურის უფროსის მამუკა ჩხეიძის ჰომოფობიურ გამოხატვის საქმეზე მიმართავს, რათა შეისწავლოს, რამდენად შესაფერისია ის დაკავებული თანამდებობისთვის.

პლატფორმის განცხადებაში ნათქვამია, რომ მიუღებელია ასეთი გამოხატვის ფორმა იმ უწყების წარმომადგენლისგან, რომელიც ყველა ღონეს უნდა ხმარობდეს, ციხეებში ქვიარ თემის დისკრიმინაციის აღმოფხვრისთვის.

პლატფორმის ცნობით, 2018 წლის 16 მაისს მამუკა ჩხეიძემ ჰომოფობიასთან ბრძოლის საერთაშორისო დღეს, შემდეგი სტატუსი მიუძღვნა. სტატუსი ჩხეიძის ფეისბუქ გვერდზე ამჟამად აღარ იძებნება:

"17 მაისი იცით რატოა გეი-პიდარმონობის დღე? მაგ დღეს ამოუღიათ გეი-პიდარმონობა დაავადებათა ნუსხიდან. ხოდა რა მინდოდა მეკითხა, განსაკუთრებით ჩემი ლიბერასტი ფრენდებისთვის: აი ეხლა ესენი ჯანმრთელები არიან? J ოღონდ სერიოზულად".

პლატფორმა აქვეყნებს მამუკა ჩხეიძის კიდევ ერთ ჰომოფობიურ კომენტარს. მათი ცნობით, სამინისტროს წარმომადგენელმა 17 მაისს, დემონსტრანტზე თავდასხმისადმი მიძღვნილ სტატუსზე დაწერა კომენტარი:

"ბიჭი იყო თუ ელგებეტე", ხოლო სხვა მომხმარებლების აღშფოთებას ისევ დისკრიმინაციული დისკურსით უპასუხა:

"ამათი სურვილია რომ აი "ეს" იყოს დღევანდელი საზოგადოებისათვის არამარგინალიზირებული, მისაღები არსებობის მოდელი. აი ვერანაირად ვერ გამოვა ეგ საქმე. აბსოლუტურად დარწმუნებული ვარ რომ "ეს" ნორმად არ მიაჩნია იმ არასამთავრობო ორგანიზაციის წევრებსაც კი, ვინც ამათ უფლებებს იცავენ. "ეს" ნორმა მხოლოდ ამათნაირებისთვისაა. მე არ მივეკუთვნები იმ კატეგორიას ვინც მოითხოვს ამათ დახვრეტას და დანაკუწებას. სახლში რაც უნდათ ის აკეთონ, მაგრამ "ეს" მათ და მათ ზურგს უკან მდგომ ძალებს უნდათ ცხოვრების ნორმად გახადონ საზოგადოებისათვის ძალად "შეტენვის" მეთოდით, ესაა აბსოლუტურად მიუღებელი. ყველგან და ყველა დროს საზოგადოებაში იყო თანხმობა, რაღაც თემებზე. მაგალითად: როდესღაც მონობა მისაღები იყო უმრავლესობისთვის, დღეს ეს მიუღებელია, ჰომო საპიენსის გარიჟრაჟზე პრობლემა არ იყო ტიტველი სიარული, დღეს არა. ბოლო-ბოლო სილამაზე ადრე არ იყო კახექსიური სიგამხდრე, დღეს კი ლამის ეგრეა და სხვა მრავალი. ამათ უნდათ რომ საზოგადოებამ ისინი აღიქვან ისეთივე წევრებად როგორც ყველა დანარჩენი (ჩვეულებრივი). არ გამოვა ეგ საქმე. დონკიხოტიზმია ეგ".

20 აპრილის დადგენილების საჯარო დაწესებულებაში ეთიკისა და ქცევის ზოგადი წესების განსაზღვრის შესახებ ვკითხულობთ, რომ საჯარო მოსამსახურე თავს იკავებს საჯაროდ სიძულვილის ენის გამოყენების ან/და დისკრიმინაციული ხასიათის კომენტარის გაკეთებისგან.

On.ge-ს სასჯელაღსრულების სამინისტროში განუცხადეს, რომ საკითხს უკვე სწავლობს უწყების გენერალური ინსპექცია.

ხელმომწერი ორგანიზაციები:

  • დემოკრატიისა და უსაფრთხო განვითარების ინსტიტუტი (IDSD);
  • ტოლერანტობის და მრავალფეროვნების ინსტიტუტი (TDI);
  • მედიის განვითარების ფონდი (MDF);
  • თანასწორობის მოძრაობა (Equality Movement);
  • საქართველოს დემოკრატიული ინიციატივა (GDI);
  • საქართველოს რეფორმების ასოციაცია (GRASS);
  • სამართლიანი არჩევნებისა და დემოკრატიის საერთაშორისო საზოგადოება (ISFED);
  • კავშირი „საფარი“;
  • საქართველოს ახალგაზრდა იურისტთა ასოციაცია (GYLA).