23 მაისს სტრასბურგის ევროპულ სასამართლოში საქმის განხილვა "საქართველო რუსეთის წინააღმდეგ (საქმე II)" გრძელდება. იუსტიციის მინისტრის, თეა წულუკიანის განცხადებით, დამატებითი მტკიცებულებებით შეეცდებიან აჩვენონ ევროპულ სასამართლოს, რომ რუსეთი ბევრად ადრე ემზადებოდა 2008 წლის საომარი მოქმედებებისთვის.

"რომ ის წვრთნიდა ადგილობრივ პერსონალს, მათ შორის, სამხედროს, ოსების სხვადასხვა ოფიციალურ დე ფაქტო დანაყოფებში და ემზადებოდა ამ სამხედრო დაპირისპირებისთვის", - განაცხადა წულუკიანმა.

მისივე განმარტებით, ისინი შეეცდებიან სასამართლოს დაუმტკიცონ, რომ 10 აგვისტოს, გამთენიისას, საქართველოს მხარემ ყველანაირი ცეცხლი შეწყვიტა და საომარი მოქმედებებიდან გამოვიდა:

"11 აგვისტოს ჩვენი შენაერთები უკვე თბილისის მისადგომებს იცავდნენ, რაც გამორიცხავს რუსეთის უსაფუძვლო მტკიცებას იმის თაობაზე, რომ თითქოს ჯერ კიდევ 12 აგვისტოს ჩვენ რუსეთს ვპასუხობდით საომარი მოქმედებებით".

სახელმწიფოთაშორის დავას სტრასბურგის სასამართლოს დიდი პალატა განიხილავს, რომელიც 17 ქვეყნის, მათ შორის, საქართველოდან და რუსეთიდან არჩეული მოსამართლეებით არის დაკომპლექტებული.