როგორც იცით, ილონ მასკს ყელში ამოუვიდა ლოს-ანჯელესის საცობები. მისი თქმით, საცობების გამო მას საკუთარი კომპანიის საინფორმაციო სესიაზე დააგვიანდა და გადატვირთული გზები ჯოჯოხეთის "მეშვიდე ან მერვე წრედ" მოიხსენია

მასკის აზრით, აშშ-ს ქალაქების უმეტესობის "სულის შემძვრელი საცობების" გასაქრობად რამდენიმე ხერხი არსებობს. უფრო მეტი გზისა და გზატკეცილის აშენების ან ალტერნატიული საჰაერო ტრანსპორტის შექმნის მაგივრად, მასკს მიწისქვეშ 10-30 მეტრი სიღრმეზე მაღალსიჩქარიანი ჰაიპერლუპის სისტემის ავტონომიური ტრანსპორტის შექმნა სურს. რა ეღირება ეს ბედნიერება? სულ რაღაც $1.

The Boring Company ლოს-ანჯელესში საცდელ გვირაბებზე მუშაობს და მასკმა ამ პროექტის რამდენიმე დეტალი გააჟღერა. ცხადი არაა, როდის იგეგმება ახალი ტექნოლოგიის ამუშავება, თუმცა მასკი ძალღონეს არ იშურებს სამყაროს სწრაფად შეცვლისათვის. თუ მისი გეგმა იმუშავებს, ლოს-ანჯელესის ერთი ბოლოდან მეორე ბოლოში მისვლა სულ რაღაც 8 წუთში იქნება შესაძლებელი.

მასკმა ასევე ისაუბრა პატარა გაჩერებების ფართო სისტემაზე, რომლებსაც ერთ ჯერზე 16 მგზავრის გადაყვანა შეეძლებათ, ამინდის გამძლე სისტემასა და ახალი ტრანსპორტის მინიმალურ გავლენაზე ადგილობრივებისათვის, ვინაიდან ახალი გზები და გზატკეცილები ამ ტერიტორიაზე არ აშენდება.

"გვირაბების შემთხვევაში ზღვარი არ არსებობს იმიტომ, რომ ყველაფერი მიწისქვეშ ხდება. შეგვიძლია ასობით ხაზი შევქმნათ", - განაცხადა მასკმა. თუ მოთხოვნა გაიზრდება, ყოველთვის იქნება შესაძლებელი გვირაბების უფრო ღრმად გაყვანა. მასკმა ასევე ახსენა UberAir-ის ახალი პროექტი, რომელიც 2020 წლიდან ელექტრონული დრონების მეშვეობით სატესტო ფრენების ჩატარებას აპირებს. მისი თქმით, ყველაზე ჩუმ ვერტმფრენსაც კი ვერ გადააფრენ ისე, რომ ხალხი არ შეაწუხო. გვირაბების გაყვანის შემთხვევაში კი საქმე სულ სხვანაირადაა, ადამიანები ვერც კი ამჩნევენ რომ მიწის ქვეშ რამე ხდება. "ჩვენ უჩინრები ვართ" - სწორედ ასე შეაფასა მასკმა გვირაბების გაყვანის პროცესი.

მასკის საბოლოო სურვილია, რომ ჰაიპერლუპით ერთმანეთს ქალაქები დაუკავშიროს, მაგალითად, ნიუ-იორკი და ბალტიმორი.