თბილისში გელოვანის გამზირზე, აგროჰაბთან, ქვეითთა გადასასვლელი გაუქმდა. ქუჩაზე ზებრები წაიშალა, გზაგამყოფ გაზონზე ქვეითთა გადასასვლელი ბილიკი ჩაიკეტა და განთავსდა ნიშანი - ქვეითთა მოძრაობა აკრძალულია. მერიის განმარტებით მიზეზი ფეხით მოსიარულეთა უსაფრთხოებაა.

მერიის პრესსამსახურში ამბობენ, რომ აღნიშნულ მონაკვეთზე ინტენსიური მოძრაობაა და იქ ქვეითთა გადასასვლელის არსებობა საფრთხის შემცვლელი იქნებოდა.

On.ge-ს კითხვაზე - ჰქონდა თუ არა მერიას სხვა გამოსავალი ზებრა გადასასვლელის გაუქმების გარდა და რატომ არ დამონტაჟდა მოთხოვნით შუქნიშანი, რომელსაც ადგილობრივები ითხოვენ მერიის პრესსამსახურში გვპასუხობენ:

"ამ მონაკვეთზე მოთხოვნითი შუქნიშნის გაკეთება არ არის რეკომენდირებული. არის მოშორებით შუქნიშანი და იქიდანაც შეიძლება ქვეითთა მოძრაობა. მეორე მხარის არის ხიდიც. დაახლოებით 200 მეტრში...

ქუჩის ნებისმიერ მონაკვეთში შუქნიშნის დამონტაჟება საგზაო მოძრაობის ორგანიზების და პრინციპებიდან გამომდინარე არ არის მიზანშეწონილი."

On.ge-ს კითხვაზე - თუ რატომ არ არის მიზანშეწონილი მოთხოვნითი შუქნიშნის დამონტაჟება იქ, სადაც უკვე არსებობდა ფეხითმოსიარულეთა გადასასვლელი და მძღოლებს მაინც უწევდათ მოძრაობის შენელება მერიაში გვპასუხობენ:

"ეს დადგენილია საგზაო მოძრაობის სპეციალისტების მიერ. თქვენც და მეც ვართ ჟურნალისტები, ამ საქმის სპეციალისტები არ ვართ. მოცემულ მონაკვეთში მიღებულია გადაწყვეტილება, რომ შუქნიშნის დამონტაჟება არ იქნებოდა მიზანშეწონილი ქალაქის ინტერესებიდან გამომდინარე."

მერიაში ამბობენ, რომ მიმდინარეობს მუშაობა სხვა ალტერნატივაზე:

"მივიჩნიეთ, რომ ქვეითის უსაფრთხოება უფრო მნიშვნელოვანია, ვიდრე ის დისკომფროტი, რომელიც მან შეიძლება განიცადოს დამატებითი მანძილის გავლით. მიმდინარეობს მუშაობა ალტერნატივაზე, რომელსაც მალე შევთავაზებთ."