იუსტიციის სამინისტროს ინიციატივით, 14 წლამდე მოზარდთა დანაშაულის წინააღმდეგ ბრძოლისათვის არასრულწლოვანთა რეფერირების ცენტრი შეიქმნება. იუსტიციის მინისტრმა თეა წულუკიანმა დღეს, 10 მაისს 14 წლამდე პირთა დანაშაულის წინააღმდეგ ბრძოლისათვის სპეციალური კონცეფცია წარადგინა.

კონცეფციის თანახმად, დანაშაულში მონაწილე 14 წლამდე ასაკის ბავშვების გადამისამართებას მაკოორდინირებელი ორგანო განახორციელებს სხვადასხვა სარეაბილიტაციო, კულტურულ, სპორტულ და სხვა მსგავს პროგრამებსა და სერვისებში.

მოქმედი კანონმდებლობით, ამ ასაკის მოზარდთა დანაშაულზე გამოძიება წყდება, რადგან 14 წლის ასაკს მიუღწეველ პირს სისხლის სამართლის პასუხისმგებლობა არ ეკისრება. ამასთან, არ არსებობს ეფექტიანი მექანიზმი, რომელიც მას განმეორებითი დანაშაულის თავიდან აცილებასა და რესოციალიზაციაში დაეხმარება.

სამუშაო ჯგუფის კონცეფციის თანახმად, არასრულწლოვანთა რეფერირებით განისაზღვრება თითოეული მონაწილე ორგანოს, უწყების თუ ორგანიზაციის როლი.

იუსტიციის სამინისტროს მიერ გავრცელებული კონცეფცია შემდეგ პუნქტებს მოიცავს:

• არასრულწლოვანთა რეფერირების ცენტრი საჯარო და კერძო სკოლებისაგან მიიღებს ინფორმაციას ქცევითი პრობლემების მქონე მოსწავლეების შესახებ, ჯანდაცვის სამინისტროსაგან კი - მიუსაფარი ბავშვების შესახებ;
• ცენტრისათვის ინფორმაციის მიწოდების ვალდებულება ექნება ყველა იმ უწყებას, რომლებიც არასრულწლოვნებთან მუშაობენ, მათ შორის, შსს-ს, პროკურატურას, არასამთავრობო ორგანიზაციებს, მუნიციპალიტეტს და სხვ. უწყებები პრობლემური ქცევის ბავშვებს რეფერირების ცენტრში გადაამისამართებენ;
• ცენტრის თანამშრომლები ინდივიდუალურად შეაფასებენ თითოეულ არასრულწლოვანს და მათ კანონიერ წარმომადგენლებთან, მასწავლებლებთან, სკოლის ადმინისტრაციასთან, სოციალურ მუშაკთან გასაუბრებით დაადგენენ, რა არის არასრულწლოვნის რთული ქცევის მიზეზი და როგორ უნდა აღმოიფხვრას ის.
• რეფერირების ცენტრის თანამშრომლის მიერ განსაზღვრულ სარეაბილიტაციო პროგრამებში/სერვისებში არასრულწლოვნის მონაწილეობა სავალდებულო იქნება;
• ცენტრი რეგულარულად განახორციელებს კონკრეტულ პროგრამებში ჩაბმული არასრულწლოვნის რეაბილიტაციის პროცესის მონიტორინგს და ეფექტიანობის შეფასებას.
• გამოვლენილი ხარვეზებისა და გამოწვევების შემთხვევაში, ცენტრი უფლებამოსილი უნდა იყოს, კორექტივები შეიტანოს არასრულწლოვნის მიმართ გამოყენებულ პროგრამასა თუ სერვისში ან ჩაანაცვლოს ის სხვა პროგრამით/სერვისით;
• ცენტრი წარმართავს ბავშვთა რესოციალიზაციის პროგრამას, შექმნის პრობლემური ქცევის მქონე 14 წლამდე ასაკის არასრულწლოვანთა ერთიან ბაზას, შეიმუშავებს მექანიზმებს მათი დროული იდენტიფიცირებისათვის.

ამავე თემაზე:

• დასჯა გამოსავალი არაა - ყველაფერი არასრულწლოვანთა მართლმსაჯულებაზე - მოკლედ