თბილისის საქალაქო სასამართლომ ოჯახში ძალადობის, მუქარისა და ქურდობისთვის ბრალდებულ პირს 4 წლით თავისუფლების აღკვეთა მიუსაჯა.

ბრალდების მხარის მტკიცებულებების მიხედვით, დაკავებული 2014 წლიდან 2017 წლის 23 ნოემბრამდე არასრულწლოვან შვილსა და ყოფილ ცოლს არასრულწლოვანი შვილების თანდასწრებით სისტემატურად აყენებდა სიტყვიერ და ფიზიკურ შეურაცხყოფას და აყენებდა დაზიანებებს. იგი ასევე აშანტაჟებდა, ემუქრებოდა და ამცირებდა მათ.

გამოძიების ცნობით, 2017 წლის 23 ნოემბერს, ბრალდებული ყოფილ ცოლს დანის გამოყენებით სიცოცხლის მოსპობით დაემუქრა.

პროკურატყრის მტკიცებით, ბრალდებულმა იქურდა. უწყების ცნობით, 2017 წლის ნოემბერში მან მოიპარა ყოფილი ცოლის კუთვნილი, 670 ლარად ღირებული სარეცხი მანქანა.

სამართალდამცველებმა ბრალდებული 2017 წლის 12 დეკემბერს თბილისში დააკავეს. მას ბრალდება ოჯახში ძალადობის, მუქარისა და ქურდობის მუხლებით წარედგინა.