ალბათ, ხშირად მოგისმენიათ, რომ ასაკი არაფერს ნიშნავს და შესაძლოა, გარკვეულ სფეროებში ეს მართლაც ასე იყოს, მაგრამ ექიმების დათანხმება ამ საკითხზე ცოტა გაგიჭირდებათ. სხვადასხვა ასაკში სხეულს სხვადასხვა გამოწვევა აქვს, ამ სხეულის მფლობელებს კი - სხვადასხვა ტიპის გამოკვლევები და ანალიზები სჭირდებათ.

თუ უკვე გადააბიჯეთ 40 წელს, მაშინ გაეცანით, რა გამოკვლევები გჭირდებათ იმისთვის, რომ არაფერი გამოგეპაროთ.

1. სარძევე ჯირკვლის სკრინინგი ქალებისთვის (40+)

ეს არის რენტგენომამოგრაფია, რომელიც 40 წლიდან ტარდება და მისი მიზანია მცირე ზომის პათოლოგიური პროცესების აღმოჩენა, რომლებიც, შესაძლოა, ხელითაც არ ისინჯებოდეს.
დამატებით შესაძლებელია სარძევე ჯირკვლის ექოსკოპიის ჩატარება და კონსულტაციის გავლა მამოლოგთან.

სიხშირე: ორ წელიწადში ერთხელ

2. პროსტატის ჯირკვლის გამოკვლევა მამაკაცებისთვის (50+)

გარდა ფიზიკურად გასინჯვისა, დამატებით შესაძლებელია სისხლის ანალიზის აღება, სადაც პათოლოგიური პროცესების შემთხვევაში მომატებულია სპეციფიკური ანტიგენი.

სიხშირე: წელიწადში ერთხელ

3. საშვილოსნოს ყელის კვლევა ქალებისთვის (25+)

იგულისხმება პირველ რიგში, პაპ-ტესტი და საჭიროების შემთხვევაში - კოლპოსკოპია. ამ გამოკვლევის ჩასატარებლად 40 წელს ნუ დაუცდით, უბრალოდ 40 წლის ზემოთ მისი საჭიროება კიდევ უფრო იზრდება. პაპ-ტესტის ჩატარება 25 წლიდან უკვე რეკომენდებულია.

სიხშირე: სამ წელიწადში ერთხელ

4. მსხვილი ნაწლავის გამოკვლევა ქალებისთვის და კაცებისთვის (40+)

თავდაპირველად კეთდება განავლის ანალიზი, სადაც ექიმები ეძებენ ფარულ სისხლდენას, რაც მსხვილი ნაწლავის კიბოს პირველი ნიშანი შეიძლება იყოს. საჭიროების შემთხვევაში კი ინიშნება კოლონოსკოპია.

5. ოსტეოპოროზის პრევენციისთვის, ორგანიზმში კალციუმის დონის შემოწმება (40+)

თუ დადგინდება კალციუმის ნაკლებობა, კალციუმის პარალელურად, აუცილებლად უნდა მიიღოთ D ვიტამინიც, რათა სხეულმა კალციუმის ათვისება შეძლოს. ეს კვლევა უმეტესად ქალებს სჭირდებათ.

6. ვიზიტი ენდოკრინოლოგთან ქალებისთვის და კაცებისთვის (40+)

ჭარბწონიანი პაციენტებისთვის 40 წელს ზემოთ აუცილებელია გლუკოზის დონის შემოწმება, რადგან სწორედ ამ ასაკში ვლინდება ხოლმე დიაბეტის პირველი ნიშნები.

თუ აუცილებელ კვლევებზე მეტის გაგება გინდათ, ნახეთ სხვა შუადღის გადაცემა, სადაც ამ თემაზე წამყვანები თერაპევტთან ერთად საუბრობენ: