გატაცებიდან ერთი წლის თავზე აზერბაიჯანელი ჟურნალისტის, აფგან მუხთარლის მხარდასაჭერად მდუმარე აქცია გაიმართება. აქციის ორგანიზატორი თბილისის ადამიანის უფლებათა სახლია.

აქცია 29 მაისს საღამოს ხუთ საათზე პარლამენტის წინ გაიმართება. ორგანიზატორების თქმით, მშვიდობიანი აქციის დროს დარიგდება მაისურები და სხვადასხვა საინფორმაციო მასალა.

"კიდევ ერთხელ გვსურს შევიკრიბოთ და ვაჩვენოთ, რომ საქართველოში ძლიერი სამოქალაქო საზოგადოება არსებობს, რომელიც ზრუნავს ადამიანების უფლებებზე და მათ დასაცავად ერთიანდება. აუცილებელია ყველამ ერთად მოვითხოვოთ საქმის ეფექტიანი გამოძიება და პარლამენტში საგამოძიებო კომიტეტის შექმნა, რაც დაეხმარება აფგან მუხთარლის დაამტკიცოს სიმართლე აზერბაიჯანში მიმდინარე სასამართლო პროცესებზე. მსგავსი ფაქტი საქართველოში აღარ უნდა განმეორდეს", - ნათქვამია ორგანიზატორების განცხადებაში.

აფგან მუხთარლის საქმე

თბილისიდან 29 მაისს გაუჩინარებული ჟურნალისტი, აფგან მუხთარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს.

აფგან მუხთარლი თავის გატაცებაზე პასუხისმგებლობას საქართველოს პრემიერ-მინისტრ გიორგი კვირიკაშვილს აკისრებს და მიაჩნია, რომ აზერბაიჯანის პრეზიდენტის, ილჰამ ალიევის და საქართველოს ყოფილი პრემიერის, ბიძინა ივანიშვილის ბიზნესპარტნიორობის მსხვერპლი გახდა.

აზერბაიჯანის ხელისუფლების ინფორმაციით, ჟურნალისტს სახელმწიფო საზღვრის უკანონოდ გადაკვეთასა და კორუფციაში ედება ბრალი. აზერბაიჯანის სასამართლომ მას ექვსწლიანი პატიმრობა მიუსაჯა. განაჩენი ძალაში დატოვა სააპელაციო სასამართლომაც.

საქართველოში შსს-მ გამოძიება სისხლის სამართლის კოდექსის 143-ე მუხლით დაიწყო, რაც თავისუფლების უკანონო აღკვეთას გულისხმობს.