შინაგან საქმეთა მინისტრის მოადგილის, ნათია მეზვრიშვილის განცხადებით, დაუსრულებელი საუბრები ლიბერალიზაციაზე, მხოლოდ ახალისებს ნარკოდანაშაულს.

"გვსურს, გამოვეხმაუროთ ბოლო დღეების განმავლობაში ნარკოტიკულ საშუალებებთან დაკავშირებით გამოთქმულ მოსაზრებებს, რომ თითქოს არსებობს მავნე და არამავნე ნარკოტიკები, რომ თითქოს მეფედრონი კლავს და სხვა სინთეტიკური ნარკოტიკი ან ჰეროინი - არა. ამგვარი მსჯელობა, ისევე, როგორც დაუსრულებელი საუბრები ლიბერალიზაციაზე, მხოლოდ ახალისებს ნარკოდანაშაულს, ახდენს ნარკოტიკების პროპაგანდას და ხელს უშლის პრევენციას", - განაცხადა მეზვრიშვილმა.

მეზვრიშვილის განცხადებასთან დაკავშირებით თეთრი ხმაურის მოძრაობის ერთ-ერთმა ლიდერმა, დავით სუბელიანმა On.ge-ს უთხრა, რომ ყველა ნივთიერებას განსხვავებული რისკიანობა აქვს, თუმცა ყველა ნარკოტიკი, შესაძლოა, იყოს საზიანო.

მისივე განმარტებით, ბოლო დღეებში ისინი განსაკუთრებით მავნე ნივთიერებებზე საუბრობენ, რადგან სახელმწიფოს მხრიდან აუცილებელ მონიტორინგს ითხოვენ.

"ვითხოვთ სახელმწიფოსგან, მუდმივად აწარმოოს მონიტორინგი ბაზარზე არსებული პრეპარატებისა და ნივთიერებიბს. თუ გამოჩნდა რამე ახალი, რომლის შესახებაც მომხმარებელმა ან ექიმმა არ იცის. ამის შესახებ ინფორმაცია მიაწოდოს სპეციალისტებს", - ამბობს სუბელიანი.

სუბელიანმა ასევე თქვა, რომ ნარკოტიკების ლიბერალიზაციაზე საუბარი ნარკოდანაშაულს არ ახალისებს და ლიბერალიზაციაზე ქვეყანაში არავინ არ საუბრობს. მისივე განმარტებით, რეპრესიული ნარკოპოლიტიკის პირობებში მომხმარებელთა რიცხი იზრდება.

როგორც სუბელიანი ამბობს, პრობლემის მოსაგვარებლად ერთადერთი გზა რეფორმის გატარებაა.