ამერიკელი მსახიობი პამელა გიდლი 52 წლის ასაკში გარდაიცვალა. ინფორმაციას Hollywood Reporter ავრცელებს. ოჯახის ცნობით, პამელა 16 აპრილს, საკუთარ სახლში გარდაიცვალა.

გიდლიმ კარიერა მოდელობით დაიწყო. მისი პირველი ფილმი 1986 წლის Thrashin' იყო, თუმცა პოპულარობა დევიდ ლინჩის ფილმით, Fire Walk With Me-თ [1990] მოიპოვა.

ფილმში ის ტერეზა ბენქსის როლს ასრულებს. ტერეზა ფილმში არასრულწლოვანი მეძავია, რომელიც კოკაინზეა დამოკიდებული. მას კლავენ და მის სხეულს მდინარეში, პარკში გახვეულს პოულობენ. მის გვამზე დატოვებულია ასო T. ტერეზას სიკვდილის გარემოებებიდან გამომდინარე, ფილმის პერსონაჟი დეილ კუპერი ლორა პალმერთან მსგავსებას პოულობს.

როგორც პამელამ 2016 წელს ინტერვიუში თქვა, ის კარიბის კუნძულებზე გადაღებებზე იმყოფებოდა, როდესაც დევიდ ლინჩი დაუკავშირდა და ტვინ პიკსის 1990 წლის ფილმში მონაწილეობა შესთავაზა.

"დევიდის შემოთავაზება ჩემს იმ დროინდელ სამუშაოსთან ინტერესთა კონფლიქტს მიქმნიდა, მაგრამ მას ძალიან სურდა, რომ ტერეზას როლი მე შემესრულებინა. მან გადამიხადა როგორც მგზავრობის, ისე დაზღვევის ხარჯები. 10 დღის განმავლობაში, ბაჰამიდან პირდაპირ სიეტლში დავდიოდი. 'ნუთუ ასე ძალიან გინდა რომ როლი მე მივიღო?' ვეკითხებოდი, ასე ძლიერ ჩემი კანდიდატურით არასდროს დაინტერესებულან".