მეტროს მემანქანეები მათი ხელფასების შესახებ გავრცელებულ ფოტო-კოლაჟებს "ბინძური პროპაგანდისტული მანქანის" მიერ გაკეთებულს უწოდებენ. კოლაჟების ინტერნეტში გავრცელება დროში ემთხვევა მემანქნეების მიერ დაანონსებულ აქციას - მუშაობის შეჩერების შესახებ.

მეტროს თანამშრომლების პროფკავშირების, ერთობა 2013-ის ინფორმაციით, მეტროს მემანქანეთა ხელფასი საშუალოდ 1 100 ლარია და არა 1 827 ლარი.

მემანქანეთა გაერთიანება ყოველთვიური ხელფასის გამოთვლის მექანიზმს ხსნის:

  1. საათობრივი ანაზღაურება საათში 6,92 ლარი;
  2. მავნე პირობების ანაზღაურება ყოველთვიურად - 56 ლარი;
  3. ღამის მოცდენის ანაზღაურება ღამეში - 8 ლარი.

მათი განმარტებით, მემანქანე თვეში მუშაობს საშუალოდ 150 საათს, ყველა პირობის გათვალისწინებით კი საშუალო ხელფასი 1 134 ლარია, 693 ლარით ნაკლები, ვიდრე გავრცელებულ ფოტოებზეა აღნიშნული. მემანქანეები განმარტავენ, რომ ისინი ხელფასის 1 500 ლარამდე გაზრდას ითხოვენ.

"ის არგუმენტი, რომ ერთს აქვს უფრო დაბალი ხელფასი, ვიდრე მეორეს და ამ მეორეს არ აქვს მორალური უფლება, რომ ხელფასის მატება მოითხოვოს მიუღებელი უნდა იყო ყველა საღად მოაზროვნე ადამიანისთვის. ყველა სამინისტრომ, ყველა სამსახურმა თუ კომპანიამ თავად უნდა იზრუნოს მის მიერ დასაქმებულების ღირსეულ ანაზღაურებაზე", - ნათქვამია მეტროს თანამშრომელთა პროფკავშირების განცხადებაში.

ამავე თემაზე: 3 მაისიდან მეტრო აღარ გაიხსნება - მემანქანეები