აგარის შაქრის ქარხანაში პირველი მაისიდან სარემონტო სამუშაოები დაიწყება და იქ დასაქმებული თანამშრომლები ხელფასს მიიღებენ. ამის შესახებ ინფორმაციას საქართველოს პროფკავშირების გაერთიანება ავრცელებს.

"შეთანხმების თანახმად - 1 მაისიდან ქარხანაში სარემონტო სამუშაოები დაიწყება, ისინი ვინც აღნიშნულ საქმეზე დაკავდებიან ხელფასს სრული ოდენობით მიიღებენ, სხვები კი ქარხნის სრულ დატვირთვამდე, რასაც შესაძლოა ერთი თვე დასჭირდეს, ავანსის სახით ნახევარი თვის კომპენსაციას", - აღნიშნავენ პროფკავშირებში.

მათივე ინფორმაციით, გეგმა მოქმედებს 31 დეკემბრამდე, წლის ბოლომდე კი ქარხნის მეპატრონემ უნდა დადოს საწარმოს დატვირთვისა და შეუჩერებლად მუშაობის გრძელვადიანი პროექტი.

ქარხანა დაიხურა 7 თვის წინ. ადმინისტრაციამ მიზეზად დაასახელა ის, რომ ვერ უწევდა კონკურენციას მათი წარმოებული შაქარი ბაზარზე ევროპიდან შემოსულ პროდუქტს. ამით 500 თანამშრომელი დარჩა უმუშევარი.

თითქმის ბოლო ორი თვეა იქ დასაქმებული ადამიანები მუშაობის განახლების მოთხოვნით აქციებს მართავდნენ. იმის გამო, რომ ვერაფერი შეცვალეს, 120 კმ გამოიარეს, თბილისში ჩამოვიდნენ. დედაქალაქში მათ ბიზნესომბუდსმენი დაპირდა, რომ ერთ თვეში ქარხნის სამუშაოები დაიწყებოდა და აღდგებოდა და ბანკები ვალებს გადაუვადებდნენ.
ამავე თემაზე: