სომხეთის ოპოზიციის ლიდერმა, ნიკოლ პაშინიანმა პრესკონფერენციაზე განაცხადა, რომ მმართველი რესპუბლიკური პარტიიდან პრემიერ-მინისტრი ვერავინ ვერ გახდება. მისივე თქმით, ახლა პრემიერის პოსტზე უნდა დასახელდეს სახალხო კანდიდატი.

"მოლაპარაკება რესპუბლიკურ პარტიასთან ხვალიდან დაიწყება. ჩვენ მოვითხოვეთ, რომ მოლაპარაკებებში მონაწილეობა მიეღო პრემიერის მოვალეობის შემსრულებელს, პარლამენტის სპიკერსა და საპარლამენტო უმრავლესობის ლიდერს. მოლაპარაკება მხოლოდ ამ ფორმატში შედგება, სხვა შემთხვევაში მას აზრი არ აქვს", - პაშინიანის განცხადების თარგმანს რუსთავი 2 ავრცელებს.

მისივე თქმით, მთავარი მოთხოვნა, სერჟ სარგსიანი გადადგომა, შესრულებულია.

"მოლაპარაკების ერთადერთი საკითხი იქნება ხელისუფლების მშვიდობიანი გადაბარება. სხვა არაფერზე ლაპარაკს არ ვაპირებთ", - თქვა პაშინიანმა.

მანვე აღნიშნა, რომ შეიქმნება გარდამავალი მთავრობა, რომელიც საარჩევნო კანონმდებლობის რეფორმას გაატარებს, რათა მომავალი არჩევნები თავისუფლად ჩატარდეს.

გუშინ, 23 აპრილს პაშინიანმა განაცხადა, რომ უახლოეს დროში უნდა დაინიშნოს რიგგარეშე საპარლამენტო არჩევნები და ხალხმა თავად აირჩიოს ხელისუფლება. ასევე, პოლიტმატიმრების დაუყოვნებილ გათავისუფლებაც მოითხოვა.

მასობრივი პროტესტიდან მე-11 დღეს სერჟ სარგსიანმა სომხეთის პრემიერ-მინისტრის პოსტი დატოვა. ამ გადაწყვეტილებით სარგსიანმა ერევანში 13 აპრილს დაწყებული საპროტესტო აქციების მთავარი მოთხოვნა შეასრულა.