ოპოზიციის ლიდერმა და სამოქალაქო დაუმორჩილებლობის აქციის ორგანიზატორმა, ნიკოლ პაშინიანმა, ერევანში, რესპუბლიკის მოედანზე შეკრებილ აქტივისტებს სიტყვით მიმართა, სარგსიანის გადგომა მიულოცა და სამომავლო გეგმები გააცნო. პაშინიანმა მთავრობას მოთხოვნებიც წაუყენა.

პაშინიანის თქმით, უახლოეს დროში უნდა დაინიშნოს რიგგარეშე საპარლამენტო არჩევნები და ხალხმა თავად აირჩიოს ხელისუფლება. მისივე თქმით, უნდა შეიქმნას დროებითი მთავრობა, რომელიც არჩევნებს გაუწევს ორგანიზებას.

პაშინიანმა პოლიტმატიმრების დაუყოვნებილ გათავისუფლებაც მოითხოვა. მისი თქმით, ამ თემებზე სასაუბროდ ქვეყნის ამჟამინდელ მმართველს, ვიცე-პრემიერ კარენ კარაპეტიანს შეხვდება.

მასობრივი პროტესტიდან მე-11 დღეს სერჟ სარგსიანმა სომხეთის პრემიერ-მინისტრის პოსტი დატოვა. ამ გადაწყვეტილებით სარგსიანმა ერევანში 13 აპრილს დაწყებული საპროტესტო აქციების მთავარი მოთხოვნა შეასრულა.