ივანე ჯავახიშვილის სახელობის თბილისის სახელმწიფო უნივერსიტეტში, წარმომადგენლობითი საბჭოს (სენატის) არჩევნებზე გამარჯვებულები გამოვლინდნენ.

თსუ-ს პრესსამსახურის ინფორმაციით, რეგისტრირებული 44 კანდიდატიდან არჩეულია სენატის 33 ახალი წევრი, აქედან -12 სტუდენტი და 21 აკადემიური და სამეცნიერო პერსონალი.

აუდიტორია 115-ის ინფორმაციით, გამარჯვებული 12 სტუდენტიდან 4 აუდიტორია 115-ის, ხოლო 6 სტუდენტური თვითმმართველობის მხარდაჭერილი კანდიდატია.

უნივერსიტეტში ამომრჩეველთა აქტივობამ 10 % შეადგინა. თსუ საარჩევნო კომისიის თავმჯდომარის გიორგი ჩაკვეტაძის ინფორმაციით, არჩევნებმა მშვიდ გარემოში, დარღვევების გარეშე ჩაიარა.

სენატის არჩევნებს საქართველოს ადვოკატთა ასოციაციის, საქართველოს ახალგაზრდა იურისტთა ასოციაციის, სამოქალაქო საზოგადოების განათლებისა და განვითარების ცენტრის წარმომადგენლები და დამოუკიდებელი დამკვირვებლები აკვირდებოდნენ.

არჩევნები უმაღლესი განათლების შესახებ საქართველოს კანონსა და თსუ-ს წესდებაში შესული ცვლილებების თანახმად ჩატარდა. ცვლილებების შესაბამისად, სენატის შემადგენლობა განისაზღვრა 74 წევრით.