შინაგან საქმეთა სამინისტროს განცხადებით, სამართალდამცავებმა 1987 წელს დაბადებული პირი ანტიკვარული ნივთების ქურდობის ბრალდებით თბილისში დააკავეს. დანაშაული 3-დან 7 წლამდე ვადით თავისუფლების აღკვეთას ითვალისწინებს.

გამოძიების ვერსიით, ბრალდებულმა თბილისში, ამაღლების ქუჩაზე, ერთ-ერთი მოქალაქის საცხოვრებელი სახლი გაქურდა და ძვირადღირებული ანტიკვარული ნივთები მოიპარა, მათ შორის:

  • რუსი პორტრეტისტის, ორესტ კიპრენსკის მიერ 1817 წელს შესრულებული ნახატი;
  • უცნობი ავტორის მიერ შესრულებული, ასევე, ანტიკვარული ნახატი;
  • მერსედესის მარკის ავტომანქანის სპილოს ძვლის მოოქროვილი საჭე;
  • 8 ანტიკვარული სკამი;
  • გემის ანტიკვარული საჭე;
  • ხალიჩა და სხვა.

პოლიციამ დაკავებულის ავტოფარეხის ჩხრეკისას, ნაქურდალი ნივთები ნივთმტკიცების სახით ამოიღო. შსს-ს ცნობით, გამოძიების დასრულების შემდეგ, აღნიშნული ნივთები კანონიერ მფლობელს დაუბრუნდება.

გამოძიება ბინაში უკანონოდ შეღწევით ჩადენილი ქურდობის ფაქტზე მიმდინარეობს, რამაც მნიშვნელოვანი ზიანი გამოიწვია, საქართველოს სსკ-ს 177-ე მუხლის მე-2 ნაწილის „ა“ ქვეპუნქტით და მე-3 ნაწილის „გ“ ქვეპუნქტით.