"როგორ წარმოუდგენია ბატონ აბაშიშვილს, რომ როცა სწორად მოიქცევიან ჩვენ მხარი უნდა დავუჭიროთ. მაშინ კი, როცა შეცდომას დაუშვებენ არ უნდა გავაკრიტიკოთ. ამ შემთხვევაში გამოვდივართ ხელისუფლების სატელიტებ. ეს ბოდვაა", - ევროპული საქართველოს წევრმა, ოთო კახიძემ პრეზიდენტის ადმინისტრაციის უფროსის, გიორგი აბაშიშვილის, ბრალდებებს უპასუხა. ამის შესახებ კახიძემ გადაცემა არჩევანის ეთერში ისაუბრა.

ოთო კახიძემ აღნიშნა, რომ ევროპული საქართველო იყო ის ერთ-ერთი პოლიტიკური ძალა, რომელიც პრეზიდენტს იცავდა უმრავლესობის თავმდასხმებისგან მაშინ, როცა მისი ქმედებები სწორად მიაჩნდა:

"მხარს ვუჭერთ პრეზიდენტ მარგველაშვილს მაშინ, როდესაც მას თავს ესხმიან აბსოლუტურად უსაფუძვლოდ. თავს ესხმიან, როგორც პრეზიდენტს იმიტომ, რომ მან ხასიათი გამოავლინა. ესხმიან თავს, რომ არ უნდა წავიდეს ვიზიტზე, არ უნდა მოაწეროს ხელი რაღაცას, უნდა გამოვიდეს სასახლიდან. შეგიძლიათ ამოიღოთ არქივები, ჩვენ მხარს ვუჭერდით თანმიმდევრულად პრეზიდენტის ინსტიტუტს, პრეზიდენტ მარგველაშვილს კი არა."

მას შემდეგ, რაც გაირკვა, რომ ოჯახში ძალადობისთვის გასამართლებული, 25 წლის ქალის მკვლელი პრეზიდენტმა შეიწყალა, მარგველაშვილმა მისი გათავისუფლების მიზეზები განმარტა, რის გამოც ევროპულმა საქართველომ და ქართულმა ოცნებამ პრეზიდენტი გააკრიტიკა. პრეზიდენტის ადმინისტრაციის ხელმძღვანელმა განაცხადა, რომ ქართული ოცნება და უმრავლესობა პრეზიდენტის წინააღმდეგ გაერთიანდნენ.

აბაშიშვილის განცხადება, უმრავლესობის წევრმა, გედევან ფოფხაძემ პარტიებისთვის საზიანოდ შეაფასა. ევროპული საქართველოს წევრმა, ირმა ნადირაშვილმა კი აღნიშნა, რომ ადმინისტრაციას არაადეკვატური და ისტერიული ტონი აქვს. კრიტიკის საპასუხოდ გიორგი აბაშიშვილმა განაცხადა, რომ პრეზიდენტმა პასუხისმგებლობა იგრძნო, ნაცვლად სხვა სახელმწიფო უწყებებისა, რომლებიც მას თავს დაესხნენ.