"[ე.წ. უდოს] საბჭომ მიიჩნია, რომ დანაშაულის ხასიათი და მისი მომავალში განმეორებით ჩადენის რისკი იმდენად მაღალი იყო, რომ არ შეიძლებოდა მსჯავრდებულის [ვეფხია ბაქრაძის] გათავისუფლება", - სასჯელაღსრულების სამინისტროს იურიდიული დეპარტამენტის უფროსმა, ალექსანდრე დარახველიძემ 25 წლის გოგოს მკვლელობაში ბრალდებულზე, რუსთავი 2-ის ეთერში ისაუბრა.

ვეფხია ბაქრაძე 2015 წლიდან, ყოფილ ცოლზე ძალადობის გამო იხდიდა სასჯელს. ის 2017 წელს პრეზიდენტის შეწყალების საფუძველზე გაათავისუფლეს.

უწყების წარმომადგენელი განმარტავს, რომ მსჯავრდებულის გასათავისუფლებლად ე.წ. უდოს კომისიამ ყველა განხილვისას, ექვსჯერვე უარი თქვა პირობით ვადაზე ადრე გათავისუფლებზე:

"მიუხედავადა იმისა რომ შეგვეძლო გაგვეთავისუფლებინა, ჩვენ მივიჩნიეთ, რომ არ აკმაყოფილებდა იმ კრიტერიუმებს რაც დადგენილია და ესენია: დანაშაულის ხასიათი, მისი წარსულში ჩადენილი დანაშაულები, დაწესებულებაში გამოვლენილი ქცევა, პიროვნული მახასიათებლები, ოჯახური მდგომარეობა და სხვა გარემოებები".

გათავისუფლებიდან რამდენიმე თვეში, ვეფხია ბაქრაძე 25 წლის ქალის მკვლელობის ბრალდებით 14 აპრილს დააკავეს. ყოფილმა მამინაცვალმა ქალს მცირეწლოვანი შვილების თანდასწრებით ყელის არეში სასიკვდილო ჭრილობა მიაყენა. ამავე საქმეზე დანაშაულის შეუტყობინებლობის ბრალდებით კიდევ ერთი პირია დაკავებული.

შინაგან საქმეთა სამინისტროს ინფორმაციით, მკვლელობამდე გარდაცვლილმა პოლიციას მიმართა და დედასთან ერთად, სავარაუდო დამნაშავისთვის შემაკავებელი ორდერის გამოცემა მოითხოვა.