ნაციონალური მოძრაობის წევრმა, გიორგი ონიანმა ბრალი აღიარა, რის შემდეგაც მასთან საპროცესო შეთანხმება გაფორმდა. ამის შესახებ On.ge-ს პროკურატურაში უთხრეს.

სააპელაციო სასამართლოს გიორგი ონიანთან საპროცესოს გაფორმების შესახებ ჯერ არ უმსჯელია. მომდევნო სხდომა 17 აპრილს გაიმართება.

შინაგან საქმეთა მთავარი სამმართველოს გლდანი-ნაძალადევის სამმართველოს უფროსის ყოფილ მოადგილეს, გიორგი ონიანს გამოძიება სამსახურებრივი უფლებამოსილების გადამეტებას, მტკიცებულებების ფალსიფიკაციას, პოლიტიკურ დევნასა და პირისთვის თავისუფლების უკანონოდ აღკვეთას ედავებოდა. ის ოთხივე ეპიზოდში დამნაშავედ სცნეს.

საქალაქო სასამართლოს გადაწყვეტილებით, გიორგი ონიანს ოთხი წლითა და ექვსი თვით თავისუფლების აღკვეთა მიესაჯა.