ნეტფლიქსი პატრიკ ზიუსკინდის "სუნამოს" მიხედვით სერიალს გადაიღებს, თუმცა სავარაუდოდ ის გერმანულენოვანი იქნება.

"სუნამო" პირველად 1985 წელს შვეიცარიაში გამოიცა. წიგნი რამდენიმე ათეულ ენაზეა ნათარგმნი და თანამედროვე გერმანულენოვან ლიტერატურაში ერთ-ერთი ყველაზე ცნობილი რომანია. მოქმედება მეთვრამეტე საუკუნის საფრანგეთში ვითარდება. ჟან-ბატისტ გრენუი - რომანის მთავარი გმირი უცნაური, ყველასგან გამორჩეული ადამიანია. იგი გამძაფრებული ყნოსვითაა დაჯილდოებული. მას შეუძლია ისეთი სურნელიც კი შეიგრძნოს, რომელიც ჩვეულებრივი ადამიანისთვის შეუმჩნეველია და შესაბამისად, არც სახელი აქვს.

ნებისმიერი არომატი მისთვის თანაბრად საინტერესოა და გამძაფრებული ინტერესით შეისწავლის მათ. ეს არის სრულყოფილი სუნამოს შექმნისა და ძალაუფლების ვნებით შეპყრობილი გენიალური პარფიუმერის ისტორია, რომელიც, საბოლოოდ, სწორედ ამ სრულყოფილების მსხვერპლი ხდება.

რომანის ერთი ეკრანიზაცია უკვე არსებობს, 2006 წელს რეჟისორმა ტომ ტიკვერმა ბენ უიშოუს, დასტინ ჰოფმანისა და ალან რიკმანის მონაწილეობით ფილმი გამოუშვა, რომელმაც კინოგაქირავებაში $135 მილიონზე მეტი დააგროვა.