ცენტრ პოინტის დამფუძნებლის, მაია რჩეულიშვილის სასამართლო პროცესი გადაიდო და ის კვლავ სასჯელაღსრულების დაწესებულებაში გადაიყვანეს. სხდომის გადადების მიზეზი მისი დის, ასევე ბრალდებულის, რუსუდან კერვალიშვილის სასამართლოში გამოუცხადებლობა გახდა.

როგორც კერვალიშვილის ადვოკატმა ჟურნალისტებს განუმარტა, ბრალდებული გუშინდელი დღიდან თავს შეუძლოდ გრძნობს და სასწრაფო დახმარების ბრიგადა დღესაც ჰყავდა გამოძახებული.

რჩეულიშვილის ადვოკატმა, მარინა ჭიღაშვილმა კი განმარტა, რომ ვინაიდან რუსუდან კერვალიშვილი კომპანიის მართვაში დიდი ხანია აღარ იღებს მონაწილეობას, სავარაუდოდ პროკურატურა მის მიმართ აღკვეთის ღონისძიებად პატიმრობას არ გამოიყენებს:

"პროკურატურის გუშინდელი შუამდგომლობა პირდაპირ მაიას წინააღმდეგ იყო მიმართული. გარემოებები, რომლითაც [პროკურატურა] ცდილობდა [ბრალის] დადასტურებას, ჩვენ არ ვთვლით, რომ ეს დადასტურებული იყო. ამას ჩვენ საჩივარში ავსახავთ. მაგრამ პირდაპირი ვექტორი იყო მიმართული მაიას ჩამოშორებაზე საქმის მართვისაგან".

მაია რჩეულიშვილების მეორე ადვოკატმა, მარინა ცუცქირიძემ კი განაცხადა, რომ ვინაიდან საქმის აბსოლუტურად ყველა მოწმის მოთხოვნა მხოლოდ მშენებლობების დასრულებაა, მაია რჩეულიშვილის დაპატიმრება ამ ადამიანებისათვის მშენებლობების დაუსრულებლობას ნიშნავს:

"დღეს თუ მაია რჩეულიშვილი იქნება იზოლირებული, რა უხარიათ დაზარალებულებს, ვერ ვხვდები. მათი ეს განცხადება, რომ თურმე მაია რჩეულიშვილის ქონებას გაყიდიან და ჩვენ დაგვიბრუნებენ, იმდენად არასერიოზული და ალოგიკურია, რომ არ ვიცი, როგორ შეიძლება ჭკუათმყოფელმა ადამიანმა ეს განცხადება გააკეთოს. მეტი მოთხოვნა მათ არ აქვთ და იმ პირობებში, რაც გუშინ გააკეთა სასამართლომ, მე არ მესმის, როგორ უნდა დაკმაყოფილდნენ ეს მოწმეები, ვინ დააკმაყოფილებს და საერთოდ მომავალში რა ეშველებათ ამ ხალხს და ვინ დაუსრულებთ მშენებლობებს".

საქმის პროკურორი, დავით გუმბერიძე კი ამბობს, რომ საქმეზე დაკითხული ყველა მოწმის შედეგად უწყებამ დაადგინა, რომ ბრალდებულებმა გაფლანგეს და მიითვისეს თანხები, ასევე უკანონო შემოსავლების ლეგალიზება მოახდინეს.

ცენტრ პოინტის საქმეზე დაკავებულები არიან ცენტრ პოინტის დამფუძნებელი, მაია რჩეულიშვილი და მისი შვილი, სამეთვალყურეო საბჭოს თავმჯდომარე, გუკა რჩეულიშვილი. გარდა ამისა, დაპატიმრებულები არიან კომპანიის აჭარის გაყიდვების მენეჯერი სალომე ჩარკვიანი და ცენტრ პოინტის ბათუმის საინვესტიციო პროექტის ხელმძღვანელი, ირაკლი მინდელი.

სასამართლო ცენტრ პოინტის დამფუძნებლებს ჯგუფურად სხვისი ქონების გაფლანგვას ედავება, საქმე ათეულობით მილიონ ლარს ეხება.