შინაგან საქმეთა სამინისტრომ ცოლის განზრახ მკვლელობის ბრალდებით უკვე დააკავა ახალგაზრდა მამაკაცი. მკვლელობა გუშინ, გვიან ღამით, ფონიჭალაში მოხდა.

რუსთავი 2-ის ინფორმაციით, ყელში დანით მიყენებული ჭრილობის შედეგად 20 წლის გოგო საავადმყოფოში გარდაიცვალა. როგორც მოკლულის ახლობლებმა რუსთავი 2-ს განუცხადეს, მკვლელობას წინ წყვილს შორის კონფლიქტი უძღოდა.

შინაგან საქმეთა სამინისტრომ გუშინ, 13 ივლისს, ცოლის მკვლელობის მცდელობისა და სხეულის განზრახ მძიმე დაზიანების ბრალდებითა და მეზობელი მამაკაცის მკვლელობის ბრალდებით ერთი პირი დააკავა. არსებული ინფორმაციით, ბრალდებულმა თეთრიწყაროში ჯერ ცოლს ეჭვიანობის ნიადაგზე ყურები დააჭრა, მეზობელი მამაკაცი მას შემდეგ მოკლა, რაც ის ქალს გამოესარჩლა. ქალი მძიმე მდგომარეობაში საავადმყოფოშია გადაყვანილი.

შინაგან საქმეთა სამინისტრომ ცოლის განზრახ მკვლელობის ბრალდებით მამაკაცი რამდენიმე კვირის წინაც დააკავა. ბრალდების მიხედვით, თბილისში მამაკაცმა ცოლს სასიკვდილო ჭრილობა ცეცხლსასროლი იარაღით მიაყენა.

პარლამენტმა მიმდინარე წლის 10 ივნისს ჩააგდო თამარ კორძაიას კანონპროექტი, რომლის მიხედვითაც სისხლის სამართლის კოდექსს უნდა დამატებოდა 1081 მუხლი: ფემიციდი - გენდერული ნიშნით მოტივირებული ქალის განზრახ მკვლელობა. კანონპროექტის მიღებას 2 დეპუტატის ხმა დააკლდა. პარტიებმა, მათ შორის გირჩმა და ნაციონალურმა მოძრაობამ მოგვიანებით განმარტეს კანონპროექტის განხილვაზე არდასწრების მიზეზები.