პროკურატურა სასტუმრო ლეოგრანდში ხანძრის გაჩენის მიზეზებზე ინფორმაციას ავრცელებს და დაკავებული პირებისთვის აღკვეთის ღონისძიების სახით პატიმრობას მოითხოვს.

ბათუმის საქალაქო სასამართლოს მიერ გაცემული განჩინების საფუძველზე, სახანძრო უსაფრთხოების წესის დარღვევის ბრალდებით, სასტუმროს ტექნიკური მენეჯერი და ამავე სასტუმროს ტექნიკური საწყობის პასუხისმგებელი პირი დააკავეს.

პროკურატურის განცხადებით, გამოძიებით დადგინდა, რომ მათ არ შეასრულეს მათზე დაკისრებული მოვალეობა - სასტუმრო ლეოგრანდში სახანძრო უსაფრთხოების ნორმების დაცვა.

რამ გამოიწვია ხანძარი?

პროკურატურის ინფორმაციით, ექსპერტიზის შედეგებით ცნობილი გახდა, რომ სასტუმროს შენობის მეოთხე სართულზე განთავსებულ ტექნიკურ (საქვაბე) ოთახში, სადაც ასევე განთავსებული იყო ვენტილაციის სისტემები, წყლის მიწოდების დანადგარები, გამათბობლები, ელექტრო კარადები და სხვადასხვა ხელსაწყოები, საწყობის მენეჯერმა სახანძრო უსაფრთხოების ნორმების მოთხოვნათა საწინააღმდეგოდ დაასაწყობა წვადი, მათ შორის ადვილად აალებადი მასალები და ნივთიერებები.

უწყებაში ამბობენ, რომ აღნიშნულმა განაპირობა 2017 წლის 24 ნოემბერს, დაახლოებით 20:00 საათზე, ტექნიკურ (საქვაბე) ოთახში გაჩენილი ხანძრის სწრაფად გაძლიერება.

რამ გამოიწვია დაკვამლიანება?

უწყების განცხადებით, ძლიერი დაკვამლიანების შენობაში გავრცელებას ხელი შეუწყო უსაფრთხოების ნორმების არარსებობამ. ამასთან შენობა არ იყო აღჭურვილი გამართული ავტომატური სახანძრო და კვამლმაუწყი სიგნალიზაციით, რაც ტექნიკური მენეჯერის პასუხისმგებლობას წარმოადგენდა.

სასტუმროს მე-5 და მე-6 სართულებზე განთავსებულ აუზსა და სპა სალონში, ხანძრით გამოწვეული ძლიერი დაკვამლიანების გამო, ნახშირჟანგით (CO) გამოწვეული მწვავე ინტოქსიკაციით გარდაიცვალა 11 პირი, ხოლო 19 პირმა მიიღო ჯანმრთელობის მსუბუქი ხარისხის დაზიანება.

მენეჯერებს ბრალდება წარედგინათ საქართველოს სისხლის სამართლის კოდექსის 243-ე მუხლის მესამე ნაწილით (სახანძრო უსაფრთხოების წესების დარღვევა, რამაც გამოიწვია ორი ან მეტი ადამიანის სიცოცხლის მოსპობა), რაც სასჯელის სახედ და ზომად 5-დან 8 წლამდე თავისუფლების აღკვეთას ითვალისწინებს.