სასტუმრო ლეოგრანდში ხანძრის გაჩენის საქმეზე ოთხთვიანი გამოძიების შედეგად შსს-მ ორი მენეჯერი დააკავა. დაკავებულტაგან ერთი თურქეთის, ხოლო მეორე საქართველოს მოქალაქეა.

შინაგან საქმეთა სამინისტროს ინფორმაციით, სახანძრო უსაფრთხოებაზე პასუხისმგებელი სწორედ ეს ორი პირი იყო. მათ მიერ ჩადენილი დანაშაული 5-დან 8 წლამდე ვადით თავისუფლების აღკვეთას ითვალისწინებს.

უწყების განმარტებით, ექსპერტიზის პასუხის შედეგად დადგინდა, რომ სასტუმრო სახანძრო უსაფრთხოების წესების დარღვევით ფუნქციონირებდა, კერძოდ, შენობა აღჭურვილი არ იყო გამართული ავტომატური სახანძრო და კვამლმაუწყებელი სიგნალიზაციით, ასევე, უზრუნველყოფილი არ იყო ხანძრის დროს კვამლის მოცილებისთვის საჭირო ავარიული კვამლსაწინაღმდეგო ვენტილაციის პროექტირებით.

მეოთხე სართულზე განთავსებულ ტექნიკურ (საქვაბე) ოთახში ინახებოდა წვადი, ადვილადაალებადი ნივთიერებები, გამოყოფილი არ იყო თამბაქოს მოსაწევი ადგილები. ამავე ტექნიკურ (საქვაბე) ოთახში დამონტაჟებული არ იყო ავტომატური მოწყობილობა, რომელიც, ხანძრის შემთხვევაში, სავენტილაციო არხებში წვის პროდუქტების გაუვრცელებლობას უზრუნველყოფდა.

2017 წლის 24 ნოემბერს ბათუმში, შავშეთის ქუჩაზე მდებარე სასტუმრო ლეოგრანდში ხანძარი გაჩნდა, რის შედეგადაც, შენობაში მყოფი 11 ადამიანი გარდაიცვალა, 19-მა პირმა კი სხეულის დაზიანება მიიღო.

გამოძიება საქართველოს სსკ-ს 243-ე მუხლის მე-3 ნაწილით მიმდინარეობს, რაც სახანძრო უსაფრთხოების წესის დარღვევას გულისხმობს, იმ პირის მიერ, ვისაც ამ წესის დაცვა ევალებოდა, რამაც გამოიწვია ორი ან მეტი ადამიანის სიცოცხლის მოსპობა ან სხვა მძიმე შედეგი.

ტრაგედიის შემდეგ სასტუმრო ლეოგრანდი გაზაფხულიდან ფუნქციონირებას ველმონდის სახელწოდებით გააგრძელებს.

როგორც სასტუმროს ადვოკატმა, კახა წერეთელმა On.ge-ს უთხრა, სასტუმროში საგამოძიებო მოქმედებები გრძელდება, თუმცა ეს სასტუმროს ფუქნციონირებას ხელ არ შეუშლის.