აფხაზეთის საოკუპაციო ხაზთან მოკლული გიგა ოთხოზორიას ოჯახი წილკანში ჩავიდა და ოკუპირებულ ცხინვალში მოკლულ არჩილ ტატუნაშვილის ოჯახს მიუსამძიმრა. ტატუნაშვილის ოჯახში ოთხოზორიას ცოლი და მშობლები იმყოფებოდნენ.

გიგა ოთხოზორიას დედამ, ჯულიეტა ჭანტურიამ ჟურნალისტებს უთხრა, რომ მას ტატუნაშვილების ოჯახის ტრაგედია დღეს, ყველაზე კარგად ესმის.

"მათი ტკივილი ჩემი ოჯახისთვის ახლობელია იმიტომ, რომ ზუსტად წელიწადისა და 10 თვის წინ მტრის ტყვიამ შვილი ვერაგულად მოგვიკლა. მასაც არ აპატიეს, რომ ქართველი ადამიანი, ქართული პასპორტი დაიცვა და ყველას თვალწინ, ექვსი ტყვიით ჩამიცხრილეს. ანალოგიურ მდგომარეობაში აღმოჩნდა ეს ოჯახიც. ნაწამები შვილის ცხედარი 26 დღის შემდეგ ძლივს მიიღეს, რომ მოფერებოდნენ და შესაბამისი პატივი მიეგოთ", - უთხრა ჟურნალისტებს ჯულიეტა ჭანტურიამ.

30 წლის გიგა ოთხოზორია 2016 წლის 19 მაისს აფხაზეთის საოკუპაციო ხაზთან, ხურჩა ნაბაკევის გამშვებ პუნქტთან მოკლეს.

ტატუნაშვილი თითქმის ერთი თვის წინ, 22 თებერვალს ცხინვალის ციხეში გაურკვეველ ვითარებაში გარდაიცვალა. არჩილ ტატუნაშვილის ცხედარი ოკუპირებული ტერიტორიიდან 20 მარტს გადმოასვენეს. ცხედარი ჯერ სამხარაულის სახელობის ექსპერტიზაზე გადაასვენეს, შემდეგ კი ოჯახს დაუბრუნეს. ცხინვალის ციხეში მოკლულ არჩილ ტატუნაშვილს შაბათს, ქანდაში, სამხედრო პატივით დაკრძალავენ.